Juve leh Inter inkhel entu awm dawn lo

Italy ramah corona-virus a leng mek a, hmun hrang hrangah mipui punkhawmna lam khap a ni. Tun kar tawpa Serie A match panga pawh fans awm loa khelh a ni dawn - Juventus leh Inter Milan inkhel pawh a hmuna en theih loh tur zingah a tel.

Hri leng vang hian kar hmasa khan Serie A match pali chu a khelh hun sawn a lo ni tawh, tun karah hian Udinese, AC Milan, Parma leh Sassuolo-a inkhelah fans an awm dawn lo. Lazio, Napoli, Lecce leh Cagliari-ah erawh a pangngaia kal tlangpui a ni ang.

Nimin tlai thleng khan BBC Sports-in a tarlan dan chuan Italy-ah hian hri leng coronavirus kai mi 229 hmuh chhuah an ni tawh a, mi pasarih an thi tawh. Hri hi a darh mek zel avangin sorkar chuan ruahmanna hrang hrang a siam a, chung zingah chuan inkhel entu awm lo pawh hi a tel.