September-ah Khabib a lo kir dawn

UFC fighter hmuhnawm Khabib Nurmagomedov chu October-a Conor McGregor a hneh hnua a vawi khat nan kan hmu leh dawn ta a, September khian UFC 242-a Dustin Poirier hmachhawn turin a lo kir dawn. 

UFC lightweight champion Nurmagomedov hian UFC 229-ah fighter hralh tla McGregor chu a round linaah a 'tap out' tir a, Irish fighter nen an inbeih zawhah hian buaina a siam zui. Kum 30 mi fighter hian octagon zuan khumin McGregor-a team zinga mi a 'attack' a, £380,950 chawitir a nih bakah thla kua chhung chu fight hmachhawn thei lo turin an hrem. 

McGregor pawh hi hrem a ni tho a, Nevada Athletic Commission chuan Khabib-a sum chawi zat tho an chawitir rualin thla ruk atan chauh an hrem thung. Russian fighter Khabib-a'n hrem a nihna a tuar zo tawh dawn a, September 7-ah Poirier nen hian chungnung zawk nih an inchuh ang. 

Kum 30 mi Dustin Poirier hi UFC fighter hmuhnawm ber pawl a ni a, April khan lightweight interim title hlawh chhuak turin Max Holloway a hneh. Vawi 31 fight a hmachhawn tawhah vawi 25 hnehna a chang a, vawi nga a tlawm tawh. Vawi 27 fight a hmachhawn tawha la tlawm lo Khabib hmaa a chet dan tur hi hmuh châkawm chu a ni.