Joshua leh Ruiz inhmachhawn leh dawn

Pathianni zinga khaw-vel hmaa a mualpho hnuah Anthony Joshua-a'n amah tlawmtu Andy Ruiz Jr a hmachhawn leh thuai dawn a, promoter Eddie Hearn chuan November emaw December-ah an inhmachhawn leh tur thu hi a sawi a ni. 

New York khawpuia boxer pahnih an inhma-chhawn ṭum khan Andy hian round sarihnaah Joshua hi a knockout a, British boxer-in professional boxing a luhchilh hnua a tlawm hmasak ber a tawng. Mahse, fighter pahnih an intawn hma hian contract-ah rematch neih leh theihna an ziak tel a, Thawhlehni khan he contract-a rematch neih theihna hi tinungin fighter pahnih hi an inhmachhawn leh dawn ta a ni.

Joshua promoter Hearn chuan, "AJ, Rob McCracken (Joshua trainer) te nen kan inbiak hnuah rematch nei tur hian thutlukna kan siam a, Andy Ruiz Jr hi AJ nen an inhmachhawn leh ang. "November emaw December-ah fight hi neih tur a ni dawn a, an inhmachhawn lehna hmun tur hi kan tichiang thuai ang," a ti a, Joshua hloh tak IBF, WBO leh WBA heavyweight title neih let an tum dawn.