Curacao hmaah India an tlawm

King's Cup-a an match hmasa berah India an chak lo nghal a, team ṭha zawk Curacao lakah 1-3 in an tlawm. Blue Tigers hian hnehna an chan zawh loh avangin pathumna chu an beisei san ber tur a ni. 

Nizan khan Thailand leh Vietnam an inkhel a, result kan hre hman lo. He inkhela chak lo zawk hian June 8-ah India nen pathumna dinhmun an inchuh leh ang. Nimin tlai inkhelah Lallianzuala Chhangte chuan India tan inkhel bul a ṭan a, mahse tawnhriat ngah leh tharum ngah zawk Curacao hmaah Lunglei rawltharin danglamna a thlen thei lo. 

India tan captain Sunil Chhetri chuan inkhel bul a ṭan a, ram tana match 108-a khelhna niin India tana inlan hnem ber record a siam nghal. Match 107 kheltu Bhaichung Bhutia record a khum a ni. 

Curacao-in Chhetri record siam lawmpui an tum lo. Minute 18 chhung lekin Western Sydney Wanderers midfielder Rolieny Bonevacia leh Dutch club ADO Den Haag tana khel Elson Hooi ten goal an rawn khung. Chhetri hian a record lawm nan minute 31-naah penalty hmangin India si phurh a rawn sut ṭhen a, mahse an hlim authawm pawh a reh hmain Cardiff City midfielder Leandro Bacuna chuan goal dang a rawn khung lehnghal! 

India-in Curacao lakah mualpho duh loin theihtawpin an nawr a, mahse CONCACAF hnuaia awm ram hian goal khung belh lam aiin venhim an ngai pawimawh zui a, beisei a bo. 

Minute 70 hnu lamah India hian an nawr na ve sawt a, Chhetri chuan crossbar a rawn tih per hial. Mahse, hai rual lohin player quality a inthlau a, European top flight football khel kawl nual thei Curacao an chak. Igor Stimac-a'n Sahal Abdul Samad, Rahul Bheke leh Brandon Fernandes te chu inkhel bul a ṭantir vek a, second half-ah kum 18 mi Amarjit Singh, midfielder Raynier Fernandes leh Michael Soosairaj te chu luhtir an ni bawk a, player paruk hi India tana an inlan vawi khatna vek a ni.