Netherlands hmaah beiseina nen Three Lions

UEFA Nations League semifinal match hnihna chu zanin dar 12:15 hian khelh a ni dawn a, team insiamṭha Netherlands leh beiseina nena indinthar mek England-te an inhmachhawn dawn. 

Netherlands hi major tournament a zawna an khelh loh hnua team insiamṭha mek an ni a, Nations League semifinal lut tur hian France leh Germany awmnaah group hmahruaitu an ni tih theihnghilh loh a ṭha. England hi sawi nep theih an ni bik lo. World Cup semifinal meuh an luh hnuah tihpalh thil a ni lo tih Nations League-ah an tarlang zui a, Spain leh Croatia awmnaah hmahruaitu nichungin a chung ber an luah. 

Three Lions hahum ri dawl zo turin Netherlands an dingchang thei ang ngem? Nge England hi World Cup ang thoin semifinal-ah an thamral dawn? Zawhna chhan sen loh tam tak a awm. 

Kum 2014 World Cup-a Netherlands-in pathumna dinhmun an luah hnuah ngai an awh leh tawh lo. Euro leh World Cup an inpetkai zo lo a, hetih chhung hian manager pali an thlak hman. 

February 2018-a Ronald Koeman lakluh a nih pawh khan beisei a sang chuang lo. Mahse, Everton ban hlim coach hian an ram team-ah danglamna a thlen a, match 12 a kaihhruaiah vawi thum chiah an tlawm. Koeman-a thutlukna siam ṭhin zingah player naupang zawk rin ngamna chu a langsar lai a ni a, Matthijs de Ligt, Frenkie de Jong leh Donny van de Beek-te chu naupang mah se Oranje jersey ha turin a ring tawk. 

Kum 19 mi De Ligt hian ram tan match 15 a khel tling der tawh a, chung zinga match 12 chu Koeman enkawlna hnuaia a khelh a ni - Dutch legend hian Netherlands a enkawl tawh match zawng zawngah De Ligt a khelhtir vek tihna a ni. 

Champions League final khel chau mah se Virgil van Dijk leh Georginio Wijnaldum chu Netherlands tana inlan turin an inpeih leh tawh a, tlarhnung laia Van Dijk leh De Ligt inkawp paltlang hautak turzia chu England pawhin an mitthla thiam ang. 

Midfield-a inkawp turin Van de Beek, Italian club Atalanta tana season duhawm hmangtu Marten de Roon leh Frenkie de Jong te an nei a, an thlaphan lohna lam tak tur a ni dawn. Dutch team panna lai erawh tlarhma a ni a, Netherlands history thlir chuan tlarhma hi an buai loh ṭhinna ber a ni. Chhe taka sawi atan erawh an la uiawm cheu a, Quincy Promes/Steven Bergwijn, Ryan Babel leh Memphis Depay chu goal nawr tura lut tura beisei an ni. 

Manchester United-a beisei phak lo Depay hian France lamah Lyon tan season liam taah khan goal 12 a khung a, hriat tel atana ṭha erawh Netherlands tana a match hnuhnung 20-ah goal 21 (13 goals; 8 assists) a thawk chhuak. 

Ram aiah club 

Tun hnaia England team-a sawi hlawh ber chu club inkar inhalna boruak chu a ni. Hemi chungchang hi United defender hlui Rio Ferdinand chuan tun hnai khan a sawi chhuak. 

England international hlui chuan, "Frank Lampard, Ashley Cole, John Terry leh Joe Cole (Chelsea) emaw Steven Gerrard leh Jamie Carragher (Liverpool ) te bulah khan inhawng takin ka ngaihdan ka sawi ngai lo. Club level-ah keimahni min hliam nan an hmang ang tih ka hlau a, United chiah kha ka ngaihtuah a ni," a ti. 

English club an inhal ṭhin em avangin Rio thusawi hi a dik tih hai rual a ni lo a, England manager Gareth Southgate pawhin, "Champions League final zawha Spurs leh Liverpool player-te kuah khawm hi ka tan chuan chona a ni," a lo ti tawh. England squad-ah hian Spurs player pali Danny Rose, Dele Alli, Eric Dier leh captain Harry Kane te an awm a, Liverpool player pathum Trent Alexander-Arnold, Joe Gomez leh Jordan Henderson an awm bawk. 

Harry Kane-a'n bul a ṭan dawn leh dawn loh a chiang lo a, striker damkawr hi Spurs manager Mauricio Pochettino-a'n Champions League final-ah meuh a ring lui a, a tisual chiang hle. 

England captain hian khelmuala hun a hman chhungin Liverpool goal-ah shot a nei miah lo a, a biru tluan chhuak tia sawi theih a ni hial - kha zana Liverpool tlarhnung vengtu Van Dijk tho kha a hmachhawn tur a ni! Three Lions tan Raheem Sterling leh Jadon Sancho chu mual sir aṭanga goal nawr tur an nih a rinawm a, Kane hian inkhel bul a ṭan lo a nih chuan Marcus Rashford chu a aia lut tur a ni ang. Khawthlang media ṭhenkhat chuan Sterling-a'n captain armband a hreng dawn tih thlengin an ziak leh tawh. 

Midfield-ah Henderson chu chawlh hahdamtir rih a nih a rinawm a, West Ham midfielder Declan Rice tan hmun a awm dawn tihna a ni. Tlarhnung laiah John Stones leh Harry Maguire chu intlar tura rin an ni bawk.