Cricket World Cup-ah India-in chakin bul ṭan

India chuan Nilaini zan khan Cricket World Cup-a an match hmasa berah South Africa chu wicket rukin an hneh. Virat Kohli hote hian Pathianni tlai dar 3:00 hian Australia an hmachhawn leh ang.

Ageas Bowl-a inkhelah South Africa chu ṭhumvawrah an chak a, vuak hmasak an thlang. Proteas hian wicket kua hlohin run 227 an siam a, India hian ball 15 dah bangin an target hi an umpha. Rohit Sharma chuan run 122 zet vaw chhuakin Men in Blue hian over 47.3-ah run 230 an siam a, wicket li an hloh.

Inkhelh ṭan hmaa fak hlawh Jasprit Bumrah-a'n thu chauh ni loin a takin a theihna a rawn pholang a, South Africa batsman-te'n an ngam lo. Bumrah hian Proteas opener pahnih Hashim Amla leh Quinton de Kock te a vawm hlum nghal.

India spinner-te an che ṭha a, Yuzvendra Chahal chuan run 51 pein wicket li zet a la. Amaherawhchu South Africa an ṭang rei thei a, over 50 thleng an vuak theih avangin run 227 an tlin -  Chris Morris (42), Andile Phehlukwayo (34) leh Kagiso Rabada (31) ten fak an phu.

South Africa bowler-ten bul an ṭan ṭha a, Shikhar Dhawan-a'n run riat lek siamin Virat Kohli pawhin run 18 bak a siam lo. Awlsam taka chak tura ngaih India chu chak lo thei dinhmunah an ding a, chutah tak chuan Rohit Sharma a rawn lang - run 122 zet vaw chhuakin Men in Blue chu dinhmun ṭha zawkah a khai chhuak.

Ṭum dang ang thoin MS Dhoni a che ṭha a, ani hian run 34 rawn belh leh bawkin champion rinkai zinga mi India-in chakin bul an ṭan. India captain Virat Kohli chuan, "Rohit-a'n a tawnhriat a hmang ṭangkai a, ṭul loah risk la loin a puitlinzia a pholang," tiin century siamtu Rohit Sharma a fak.

South Africa erawh vawi thum an chak tawh lo a, Chris Morris chuan, "Kan rama min ṭantute ka chah duh chu min thlawp hram hram ula, kan dinhmun siam rem turin theihtawp kan chhuah ang," tiin a sawi.