Buffon-a'n PSG a chhuahsan

Italian goalkeeper legend Gianluigi Buffon chuan thla tawpa a contract tawp rualin Paris St-Germain a chhuahsan dawn a, kum 41 mi ni tawh mah se inkhelh chawlhsan lam erawh a la sawi lo. 

Buffon hian July 2018 khan PSG hi Juventus aṭangin free transfer-in a zawm a, inelna hrang hrangah match 25 inlan sakin Ligue 1-ah an champion. Juventus tan kum 17 a khelh chhunga Serie A nomawi vawi kua chawitu Buffon chuan, "Hmasawnna kawnga nasa taka min puih hnuin hlim takin ka chhuahsan a, Italy pawna ka zinkawng chu a tawp ta," a ti. 

Italy tana inlan hnem ber nichunga match 176 inlan thei Buffon hian World Cup 2018-a an ram team a kai zawhpui loh hnuin ram tana inlan a chawlhsan a, a thusawi dan aṭangin club football erawh chawlhsan mai loa Italy-a inkhelh a la tum niin a lang. 

Buffon chuan, "Ernest Hemingway khan khawvelah hlim taka kan awm theihna chu kan in leh Paris chiah niin a sawi a, keipawhin vawiin aṭang chuan Paris hi ka in pakhatah ka ngai reng tawh dawn a ni," a ti. Kum 2006-a Italy-in World Cup nomawi an chawi khan Buffon hi si ban nghaktu a ni a, champions League-ah erawh nomawi chawi loin vawi thum final-a khelhah a tlawm vek!

PSG chairman Nasser Al-Khelaifi chuan, "Gianluigi Buffon-a'n kan club jersey a hak avanga PSG chhungkua leh fan-ten lawmna nasa tak an neih kha ka theihnghilh tawh lo ang. "PSG tan a khelh chhungin a tawnhriat ropui tak kha a khelhpui mai ni lo he club tan hian a hmang a, a rilru inhawng leh inpe tak kha kan ngai dawn hle a ni," a ti a, Buffon-a thlah.