Portugal-in Nations League final an lut Ronaldo Ronaldo Ronaldo

Nilaini zana Nations League semifinal khelhah Portugal-in Cristiano Ronaldo hattrick hmangin Switzerland 3-1 in an hneh. Pathianni zan final-ah nizana England leh Netherlands chak zawk an hmachhawn ang.

Estadio do Dragao-a inkhelah Ronaldo freekick hmangin Portugal-in minute 25-naah hma an hruai a, Switzerland-in Ricardo Rodriguez hmangin an sut. Amaherawhchu ṭum dang ang thoin danglamna thlentu chu Ronaldo a ni a, Juventus forward hian minute 88-na leh 90-naah goal hnih dang a khung.

Kum 34 mi Ronaldo hian Portugal-in semifinal an thlen theih nan match khat pawh a khel lo a, international match hnuhnung pariatah vawi hnih chiah a inlan. 

March thla khan Portugal hi Euro qualifier-ah Ukraine leh Serbia nen an inhnehtawk a, Ronaldo hian bul ṭan ve vein goal a khung lo. Ronaldo a chuai ṭan tiin an sawi a, Real Madrid forward hlui tel lo pawh ni se Portugal-in player an neih ṭhat thu an ziak uar hle.

Amaherawhchu Ronaldo tel loa ṭha Portugal hi Ronaldo telin an ṭha lehzual a, mamawh hun takah a ṭhatna a pholang. Ronaldo hian minute 25-naah freekick aṭangin mawi zetin a khung a, Swiss keeper Yann Sommer a bum chiang hle. 

VAR ṭanpuinain Switzerland-in penalty an hmu a, Ricardo Rodríguez-a'n siphurh sut nan a hmang. Portugal an khel ṭha bik lo a, amaherawhchu Ronaldo an neih miau avangin hnehna an chang. Manchester United forward hlui hian minute hnih chauh a awm tawh tihin Bernardo Silva pass chu goal-ah kawh zetin a pet lut. Hetah hian duhtawk loin minute 90-naah counter attack hmang ṭangkaiin player ṭha bikin an khung ṭhin dan angin Ronaldo hian a hattrick siamna goal a khung.

Ronaldo hian international tournament 10 - 2004 Euro, 2006 World Cup, 2008 Euro, 2010 World Cup, 2012 Euro, 2014 World Cup, 2016 Euro, 2017 Confederations Cup, 2018 World Cup leh 2019 Nations League-ah goal a khung vek.

Portugal captain hian ram tan match 157-ah goal 88 a khung tawh a, international match-ah amah aia khung tam chu Iran striker Ali Daei (109) chiah a awm. Club leh ram tan hattrick vawi 53 a siam tawh a, Portugal tan hattrick vawi sarih siamin Real Madrid (44), Manchester United (1) leh Juventus (1) ah hattrick a siam vek bawk.

Portugal coach Fernando Santos chuan, "Ronaldo chungchang sawi nan hian ṭawngkam chi hrang hrang ka hmang kim ta hle. Kum 2003 khan ka enkawl tawh a, thui tak thleng turin ka beisei hrim hrim. Thil reng rengah hian danglam bik a awm zel a, football-ah chuan amah hi a danglam bik," tiin a dah sang hle.

Portugal midfielder Bernardo Silva chuan minute 53-naah penalty a hlawh chhuak a, amaherawhchu VAR a inrawlh hnuah Referee Felix Brych-a'n a thutlukna sutin Switzerland zawk penalty a pe thung.

Manchester City midfielder Silva-a'n penalty a hlawhchhuah hma hian Portugal defender Nelson Semedo chuan Steven Zuber chu box chhungah a titlu a, referee Felix Brych chuan Switzerland hi penalty a pe ta zawk.