Copa America khel lo tur Neymar

Neymar chu an ramina an thlen tur Copa America-ah a inlan ve thei dawn lo. Paris St-Germain forward hi Nilaini zana Brazil leh Qatar te inkhelah a ke rek a hliam a ni.

Mane Garrincha Stadium, Brasilia-a inkhelah Neymar hi hliam vangin minute 17-naah lakchhuah a ngai a, a chawlh chen tur chiang nghal lo mah se June 14 aṭanga khelh tur South America ramte football hmanga inelna lianah chuan a tel hman dawn lo.

Qatar nen friendly match an khelhah hian Everton hmatawng Richarlison chuan minute 16-naah goal hmahruai a khung a, goal hmasa luh aṭanga minute kuanaah Premier League champion Manchester City striker Gabriel Jesus-a'n an goal hnihna a khung bawk.

May thlaa Brazil captain a nihna an lak sak Neymar hi dam se chuan Brazil innghahna pakhat a ni dawn. Ram tan match 97 a khelh aṭanga goal 60 khungtu hi coach Tite chuan, "Thlak theih loh," tiin a hmun ruak luah a harsat tur thu a lo sawi tawh a ni.

Kum 27 mi Neymar hian 2017 August thla khan Barcelona aṭangin PSG a zawm a, Ligue 1 club lamah hian hliam vangin a buai fo. Kumin January aṭanga April thla thleng pawh kha hliam vangin a inkhel thei lo. Captain nghet mumal nei lo Brazil hian 2007 hnua a vawi khat nan Copa America nomawi chawi an tum dawn a, tun ṭumah hian PSG defender Dani Alves chu an ram captain a ni ang.