Oracle Arena luhchhuahtu Raptors Stephen Curry-a point 47 a thamral

Basketball khel thiam bik Stephen Curry-a'n point 47 zet nei thei mah se Golden State Warriors chak nan a tawk zo lo a, thawhhona ṭha leh inkhairual taka khel Toronto Raptors lakah 123-109 in an tlawm. 

Raptors hian NBA Finals series-ah 2-1 in hma an hruai a, June 8, Inrinni hian Oracle Arena-ah bawk game 4 khelh leh a ni ang. NBA champion Warriors tan mahni muala chak loh nawn chuan lallukhum hlohna a ni thei ang.

Hliam vangin Kevin Durant, Klay Thompson leh Kevon Looney te an khel thei lo a, player langsar leh tawnhriat ngah pahnih inlan theih loh zanah Curry-a'n zo takin mawhphurhna a la - American guard hian point 47 hmuin NBA playoff china a hmuh san ber ṭum a ni.

Amaherawhchu, Curry hian thlawptu a hmu ṭha tawk lo, Draymond Green-a'n point 17 nei ve bawk mah se Andre Iguodala (11points) bakh Golden State player zingah point 10 nei tling thei an awm lo. A zawna season thum chhung NBA nomawi chawi an duh a nih chuan hmasawn an mamawh.

Warriors coach Steve Kerr chuan, "Steph hi chu a ṭhain a hmuhnawm chungchuang a ni, court chhunga a che vel hian lung a tiawi ṭhin. Mahse, a pawimawh ber hnehna kan chang zo lo erawh a pawi, inbuatsaih nan ni hnih kan neih hi a ṭha thei ang bera hman kan tum ang," a ti.

Rinkai ni lo zawk chungin Oracle Arena-ah Toronto Raptors an lenglut a, inkhel bul ṭantu panga - Kawhi Leonard (30 points, 7 rebounds, 6 assists), Kyle Lowry (23 pts, 9 assts), Danny Green (18 pts), Pascal Siakam (18 pts, 9 rebs, 6 assts) leh Marc Gasol (17 pts leh 7 rebs) te an khel ṭha vek.

Mikhual team hian chawlhlawk laiin 60-52 in hma an hruai a, inkhel chawhnu lamah Golden State lamin an inthlauhna tihniam ve deuh ṭhin mah se; minute 5 leh second 42 chauh a awm tawh tihin Leonard-a'n mawi taka lay up lutin an inthlauhna chu point 17 zet a ni, inkhel tawp thlengin point 10 chungin hma an hruai tluan.

Raptors coach Nick Nurse chuan, "Player zawng zawngin inrintawkna an nei, ni danga point hmu sang ngai vak lo pawhin an nei sang vek," tiin a sawi. Raptors thiampuipa Leonard pawhin NBA champion an nih theih nan match hnih chiah chak an hmabak tawh thu a sawi ve bawk.