Tokyo Olympics zawhah chawlh ka tum - Mary Kom

MC Mary Kom chuan India tan 2020 Tokyo Olympics-ah hlawhtlinna chan ngei a duh thu a sawi a, infiamna khawmpui lian hnu lamah chuan boxing chawlhsan a rilruk thu a sawi chhuak bawk.

World champion vawi ruk ni tawh Kom chuan, "2020 hnu lamah chawlh ka duh ka ring, kan ram tan hian Tokyo-ah gold medal hnek chhuah ngei phawt ka duh a ni. "Ram tan hian ka theihna zawng zawng ka hmang ṭhin a, eng medal pawh dawng ila a pawi lo, duhthusamah chuan gold medal ni thei se. Tunah hian Olympic qualifer leh World Championship atan inbuatsaihna ka nei ṭan der tawh," tiin a sawi.

Rio Olympic-ah khan Kom hi a inlan phak lo a, 2016 December thla aṭanga a khelh tawhna 48kg aṭangin tunah hian 51kg huanga khel turin inbuatsaihna a nei chhunzawm - Indian Open lamah pawh he category-ah hian a inlan tawh.

Manipuri boxer chuan, "51kg category hi ka tan thil thar a ni vak lo, kum nga liam ta vela ka lo khelh tawh ṭhinna a ni. International Olympic Committee (IOC) leh International Boxing Association (AIBA) lamin hetianga ruahmanna an siam hi ka zawm a ngai, ka taksa rih zawng tih danglam hi chu a harsa lo," tiin a sawi.