Chhantea telna India U19 chak lo

Granatkin Memorial Tournament-a an match hnihnaah India Under 19 an chak zo lo leh ta a, Mizo rawlthar Lalchhanhima Sailo telna team hian Moldova chu 2-1 in an ngam lo. 

Blue Tigers rawlthar rual hian an match hmasa berah Russia chu 3-0 in an ngam lo tawh a, Moldova lakah insiamṭhat tum chungin an inlan. 

India tan striker ṭhangduang Rohit Danu chuan minute 34-naah goal hmahruai a khung a, goal dang lut tawh loin chawlhlawk an hmang zui. Second half-ah Moldova-in India an nawr na sawt a, tlawm an duh lo. Minute 54-naah an mamawh goal an zawng hmu ta nge nge a, Dan Puscas chuan box pawn aṭangin ṭha zetin a pet lut. 

Minute hnih chauh a liam hman a, India an talbuai zui. Robin Yadav chuan Cojocari a tih tluk avangin penalty a chawi a, Moldova captain Gaiu Valeriu chuan goal-ah a chantir. Moldovan defender Alexandre Vacarciuc chu minute 76-naah hnawhchhuah ni mah se India-in player tam zawka an khelh an chhawr ṭangkai thei lo a, 3-1 in an tlawm. 

Armed Veng rawlthar Chhantea chu Moldova lakah hian second half-ah luhtir a ni a, Russia lakah bench aṭanga luhitr a ni bawk - vawiin hian Bulgaria nen group stage-a an match tawp ber an khel ang. Chhantea hi India squad-ah hian Mizo player awmchhun a ni.