FIFA U20 World Cup Zaninah semifinal lut tur a hriat dawn

2019 FIFA U20 World Cup chu May 23 aṭang khan Poland-ah khelh ṭan a ni a, zanin hian quarterfinal khelh zawh a ni ang.

Zanin dar 7:00 hian USA leh Ecuador an inkhel ang a, zan lai dar 12:00-ah South Korea leh Senegal te an inhmachhawn dawn bawk. Nizan khan Colombia leh Ukraine bakah Italy leh Mali te an inkhel a, result kan hre hman lo.

Team 24 telna U20 World Cup semifinal hi June 11, Thawhlehni zanah khelh a ni ang a, final hi June 15, Inrinni zanah khelh tur a ni.

Round of 16 thlenga goal khung tam ber chu Norway striker Erling Braut Haland a ni a, kum 18 mi Red Bull Salzburg striker hian goal kua zet a khung. First round-ah Norway tla nghal mah se Erling Braut hi amah hnaihtu Senegal forward Amadou Sagna leh USA forward Sebastian Sogo ten goal li ve ve chiah an khung avangin Haland hi top scorer ni turin a dinhmun a ṭha hle.

Erling Braut hi Notting­ham Forest, Leeds United leh Manchester City defender hlui Alf-Inge Haland fapa a ni a. Alf-Inge Haland hi Manchester United captain hlui Roy Keane-a'n a khupa a tlawh avangin inkhelh a chawlhsan a, Keane hian a chanchin ziahnaah a tlawh luih thu a ziah avangin match nga bakah £150,000 an chawitir. Haland erawhin Keane hi huatna a nei zui lo a, player naupang leh a enkawl player-te tana entawn tlak ni tura a nun thlak tura a duh thu a sawi thung.

Alf-Inge Haland fapa Erling Braut Haland hi Leeds-ah a piang a, a club ṭan ber pawh Championship-a khel mek Leeds United a ni a. Erling Braut hian group stage-a Honduras an hmachhawn ṭumin goal kua a khung a, U-20 World Cup-a match khata goal khung tam ber record a siam.