US billionaire kutah Fiorentina

Sumdawng hausa tawntaw Rocco Commisso chuan Italian club Fiorentina chu Della Valle chhungkua hnen aṭangin a lei fel a, club a lei thu hi US cable company Mediacom Communications-in an puang a ni.

Mediacom chairman leh CEO ni bawk Commisso hian infiamna lam a ngaihven hle a, US football club pakhat New York Cosmos pawh a lo lei tawh a, tun hma deuhin Italian club pakhat AC Milan nen pawh indawrna a lo nei tawh.

Kum 69 mi Commisso chuan, "Tun hnai season 17 chhung Fiorentina lo enkawl tawhtu Della Valle family chungah ka lawm, he club tan hian lungphum nghet takin an lo phum tawh a, ṭha taka chhunzawm kan tum ang," tiin a sawi.

Italian club an hralhna man zat tak hi tarlan a ni lo a, season hmasa Serie A table-a 16-na hian European football khel tur pawhin nasa taka hmasawn an mamawh dawn a ni.