Dutch Revolution ṭhiat turin Ronaldo?

UEFA Nations League final-a intum tur chu Portugal leh Netherlands an ni - Ningani zan khan Netherlands chuan semifinal-ah 3-1 in England an hneh a, final an lut. 

Pathianni zan dar 12:15-ah Netherlands leh Portugal hian champion an inchuh nghal dawn a, khawvelin Nations League champion hmasa ber hmuh châkin final khelhna tur hmun Porto lam a hawi ang. Portugal hi Cristiano Ronaldo hattrick hmanga semifinal-a Switzerland ngamtu an ni a, Netherlands hi Ronald Koeman hnuaia team indinthar mek an ni thung. 

Tlarhnung chakna hmanga 'Dutch Revolution' thlentirtu team hi khawvela forward ṭha ber ang hiala mi tam takin an chhal Ronaldo hian a su tlang zo dawn em? Zawhna chhanna pek kan ni thuai dawn e. 

February 2018-a Netherlands-in Koeman an lakluh khan khawvelin beiseina sang tak a nei ngam lo - Everton-ah beisei ang result a neih theih loh avanga an ban hlim coach a ni miau a!

Mahse, player a nih laia defender goal khung thei hmingthang Koeman-a'n a thiam a lo la theihnghilh reng reng lo. Tlarhnung leh midfield laia a player neih ṭhat a hre ran a, chumi mil chuan team a din. UEFA Nations League Group 1-ah France leh Germany an awmpui chungin an inkhelh kual vek hnuah a chung berah an awm a, Euro leh World Cup khel lo team khan semifinal an lut daih!

Dutch team hian final lut turin an kalkawngah tlarhma ṭha France, Germany leh England an hmachhawn chungin goal nga chiah an chhuah a, goal 11 an khung thung. 

Dutch team tlarhnung 'regular' en ila, a laiah Virgil van Dijk leh Ajax captain Matthijs de Ligt an inkawptir thei a, a sirah PSV Eindhoven defender ṭhangduang Denzel Dumfries leh Daley Blind an awm bawk. 

Midfield chu 'duhthusam' tia sawi theih a ni a, a laia awm turin pound maktaduai 65-a Barcelona pantu Frenkie de Jong leh Champions League-a a vawi khat nana Atalanta hruai thlengtu Marten de Roon an inkawptir a, Ajax rawlthar Donny van de Beek chu bench-ah an dah thei!

Ṭum danga an hmingṭhat ṭhinna tlarhmaah Netherlands-in sawi vul chuk tur player nei lo mah se midfield leh defence chu innghah nan ber an hman avangin an talbuai phah lo a, an vanneihna chu Memphis Depay a 'form' hi a ni. 

Lyon forward hi ram tana a match hnuhnung 21-ah goal 23-ah a inrawlh! Vawi 13 a pet goal a, assist vawi 10 a nei - amah thlawp tura Georginio Wijnaldum a neih bawk avangin Portugal tlarhnung buaina thlen turin an ṭha tawk tih ringhlel suh. 

Portugal-in team dang zawng aia danglam bikna pakhat an nei a, chu chu 'Cristiano Ronaldo' a ni. Eng team pawhin Ronaldo ang player an kawl chuan team hlauhawm an ni nghal a, zuam ngawt theih an ni lo, tihna a ni nghal bawk. 

Ronaldo 'team' hian an thiampuipa tel lo hian group 3-ah Italy leh Poland an paltlang a, semifinal an lut. Juventus forward tel lo pawhin an ṭha tawk tihna a ni a, a tel 'ngat' phei chuan ṭha tak an ni. Ronaldo hian semifinal aṭangin a hmel a lan ṭan a, Switzerland lakah 3-1 in an chak - goal thum hi a khung vek a ni a, goal ṭha tak vek an ni bawk. Swiss player-ten hnai takah Ronaldo thiamzia an en a ni ber. 

Mahse, Portugal-in an paltlang Italy, Poland leh Switzerland-te hi Netherlands ai chuan an nem zawk vek tih phat rual a ni lo a, Dutch team-in an paltlang nena khaikhinin Netherlands zinkawng a hautak zawk tih ngam a ni bawk -  zanin thawnthu tur hriat a châkawm ta hle.