Chelsea-in hrem an nihna an khing

Premier League club Chelsea chuan nipui leh thlasik transfer-a bazar thei lo tura hrem an nihna chu an khing a, infiamna khawvela rorelna sang ber Court of Arbitration for Sport (CAS) hnenah FIFA-in an hremna hi ngaihtuah sak turin an thlen a, £460,000 chawi tura tih an nihna chu an khing tel bawk. 

Chelsea hi kum 18 hnuai lam mi, ram pawn player an lak danah thil felhlel a awm nia ngaiin FIFA chuan January 2020 thleng chu transfer bazar-a che thei lo turin an hrem a ni. CAS hian thutlukna an siam hun tur an sawi theih rih loa, Chelsea hian CAS-in an chungchang a ngaihtuah chhunga hrem an nihna hman theih lo tura ti 'khawtlai' turin an dil tel lo. 

August 8-ah transfer bazar a inkhar dawn a, Chelsea hremna hi hlip pawh ni se CAS hian thutlukna an siam hman lo a nih chuan Blues hi tun nipui bikah chuan an bazar thei dawn chuang lo tihna a ni. Blues hian player langsar Tammy Abraham (Aston Villa), Michy Batshuayi (Crystal Palace), Alvaro Morata (Atletico Madrid), Victor Moses (Fenerbahce), Kenedy (Newcastle), Tiemoue Bakayoko (AC Milan) leh Kurt Zouma (Everton) te loan-in an chhuahtir a, an duh chuan an player-te hi an ko kir thei ang.