Sevilla ngamtu Barcelona 'comeback' a ropui

Nilaini zan Copa del Rey semifinal second leg-ah football hmuhnawmna tifamkimtu chu a thleng vek - injury time goal, extra time goal, red card leh penalty hlah chenin!

Thawhṭanni khan Barcelona president hlui Josep Maria Bartomeu chu dik lo taka a thuneihna hman leh midang tih mualpho chungchangah man a ni a, Copa del Rey semifinal ai mahin he chanchin hian ngaihven a hlawh zawk. 

Mahse, khelmual pawn lam buaina hi Barca-in an delh beh tir duh lo a, first leg-a 2-0 a an ngam loh tawh Sevilla chu 3-0 a hnehin Copa del Rey final an lut. 

Barcelona tan Ousmane Dembele-a'n minute 12-na lekah goal hmahruai a khung a, Gerard Pique-a'n hun pek belh minute linaah khung ve lehin extra time khelh a ngaih phah - Martin

Braithwaite chuan extra time-ah hian khung belh zuiin, inkhel hmasa nena belhkhawmin 3-2 in Barcelona an chak daih!

Tun hnaiah Barcelona-in sum lamah harsatna nasa tak an tawk a, hemi chungchangah hian Thawhṭanni khan Police-te chuan Barca office an dap a, mi pali lai an man.

Man zingah hian Barca President kal chhuak ta Bartomeu pawh a tel a, a adviser Jaume Masferrer nen Barcelona police station-ah zan khat hun an hmang a, club chief executive Oscar Grau leh legal service director Roman Gomez Ponti-te pawh man niin Bartomeu-te chhuah hnuah an chhuah. 

Barcelona hi firm pakhat I3 Ventures chu sum pe a, an player-te social media-a beih tirah puh an ni a, player beih zingah Lionel Messi leh Gerard Pique an tel - hei hi Bartomeu-a'n a hmai bal lutuk tur phih fai nana a tih anga ngaih a ni. 

Player khel lai bakah hian coach hlui Pep Guardiola, club legend Xavi leh Carles Puyol-te pawh fake account hmanga nasa taka beih an ni a, hriatchhuah a nih leh tak si avangin Bartomeu leh a ṭhuihruaite hma hun a êng lo hle. 

Hetiang taka buaina karah hian Barcelona-in Pathianniah club President thar an thlang dawn a, Catalan club tluchhe mek dinthar tuma President chuh tum Joan Laporta, Victor Font leh Toni Freixa-te chuan Copa del Rey semifinal second leg hi a hmunah an en. 

Nou Camp-a inkhelah heng buaina zawng zawng hi Barcelona player-ten indelh beh tir an duh lo a, inkhel ṭantir aṭangin an nawr nghal - minute 12-naah Ousmane Dembele a inlar a, Sevilla defender ven karah ṭha zetin goal hmahruai a rawn khung. 

Barca-in an nawr chhunzawm a, Lionel Messi ball khalh luh aṭanga goal ngei tura lang chu Argentine tana a khelhpui, Sevilla full back Marcos Acuna chuan goal line aṭangin a lo pet chhuak hman. 

First half-ah goal dang a lut lo a, chawlhlawk hman hnuah Barca bawk chu hlauhawm hmasa niin Jordi Alba chuan bar a pet per dawp - Sevilla hun a her chhuak zui a, bench aṭanga luhtir Lucas Ocampos chuan Barca defender Óscar Mingueza lakah penalty a hlawh chhuak.

Sevilla-in penalty aṭanga goal an khung chuan away goal an nei ang a, Barca tan tlang tur chuan goal thum dang tal khung belh a ngai dawn - Ocampos-a lo pen chhuak a, mahse, Argentine forward penalty a nem hret a, Marc-Andre ter Stegen tan dan harsa a ni lo. 

Goal dang a lut lawk lo a, minute 90-a pelh tawh avangin first leg-a goal hnih khungtu Sevilla-in an ke lehlamin final an rap tawh a tih theih. Mahse, Barca vanneih zan a ni tlat. 

Hun pek belh minute linaah Pique chuan bench aṭanga luhtir Antoine Griezmann cross aṭanga ball kal chu a tauh lut a, extra time khelh a ngaih phah - minute 95-naah Braithwaite chuan Alba cross a tauh lut ve leh a, hun a tawp meuh chuan 3-2 in Barca an tlang ta daih. 

Sevilla an vanduai takzet - penalty an khung loh bakah hian Pique-a'n si phurh sutna goal a khung hma lawkin midfielder Fernando chu Francisco Trincao laka a foul avangin hnawhchhuah a ni a, minute 54-naa lakchhuah striker Luuk de Jong chu bench lama an lo pawr deuh avangin extra time-ah red card pek a ni bawk. 

Barcelona-in hnehna an chan avangin Copa del Rey final an lut a, final-ah hian Levante leh Athletic Bilbao inkhela chak zawk an hmachhawn ang - team pahnih hian nizan khan semifinal second leg an khel a, result kan hre hman lo. 

Athletic Bilbao khelmuala first leg-ah team pahnih hi 1-1 in an inhnehtawk. Barca hian Copa del Rey-ah nomawi vawi 30 chawi tawhin a champion ngun ber record an chelh mek a, record siam belh turin an dinhmun a ṭha leh ta hle. 

Barca boss Ronald Koeman chuan, "Game hnih kan khelhah kan ṭha zawk ve ve a, ka lawm a ni. Minute tawp lamah khan kan vannei a, mahse, ka team khan a tawp thlenga an tih ṭhat vang a ni. Beiseina an nei tlat a, champion kan phu a ni," a ti. 

Sevilla coach Julen Lopetegui chuan, "Football nunrawnna kan tem a ni," tiin an chak loh chungchang a sawi a, "A na kan ti takzet a, kan fan-te lakah kan inthiam lo hle a ni," tiin fans ngaihdamna a dil zui.