Rublev lakah Murray a tlawm

Tennis court chhungah Andy Murray a inlan leh thei tawh, world number 1 hian harsatna nei loin khel thei leh tawh mah se atan Andrey Rublev a ṭha mah mah a, Rotterdam Open second round inkhelah Britain tlangval hi 7-5, 6-2 in a chak lo.

Nikum August thla hnua a vawi khat nan Murray-a'n tournament a khel leh chiah, a match hmasa zawkah Robin Haase hneh mah se world number 8 Rublev lakah erawh set a la thei lo a ni.

Seeded palina Rublev hian hnehna chang turin darkar khat leh minute 34 bak a mamawh lo, a khingpui hi inkhelh rei vangin a ranking pawh a tlahniam tawh hle - tun dinhmunah world number 123 a nih avangin atan hna a awlsam.

Grand Slam vawi thum champion tawh Murray chuan, "A tir lamah khan ka khel ṭha viau a, a hnu lamah erawh ka zuih. Tihsual ka ngahin double fault ka nei nual, ka forehand a la ṭha tawk lo bawk," tiin hmasawn a la ngaih nasat thu a sawi.

Inkhel dangah Russian tlangval Karen Khachanov chuan darkar khat leh minute 14 chhung lekin Cameron Norrie chu 6-2, 6-2 in a hneh - player pahnih hi an vawi khat intawnna chiah a ni. Khachanov-a'n a match hmasa lamah Stan Wawrinka a lo hneh tawh bawk.