Milan tan nomawi a hla hret

AC Milan tan Serie A champion ni turin kawng a harsa hret dawn. Nilaini zan inkhelah Milan hi chak lo tura an lan hnuah Udinese nen an inhnehtawk hram a, hmahruaitu Inter Milan nen an inkar sawm zim theihna remchang an neih chu an bawhpelh.

San Siro a inkhelah goal a lut mai lo, minute 68-naah mikhual lamin Rodrigo Becao hmangin goal an khung, hun tawp thlengin an venghim tluan thei teuh hle. Mahse, minute 90+7-ah Franck Kessie chuan penalty aṭangin an si phurh a sut hram.

Milan hian 2010-11 hnua a vawi khat nan league champion leh an beisei, mahse an chunga awm Inter aiin point thumin an hniam - match khatin an khel hnem. Antonio Conte nauten nizan khan Parma an hmachhawn a, an chak chuan point rukin an fal ang.

Champion lai Juventus chu pathumnaah awmin a vawi 10 nan 'Scudetto' hum ngei an tum. Inter pawh hi league nomawi an chawi hnuhnung ber chu 2009-10 season daih tawh kha a ni. League match khelh hmabak 14 la awmin title inchuh boruak a sang dawn hle.

AC Milan coach Stefano Pioli chuan, "Hnehna chan ngei kan duh, point khat chauh kan hmu hi a pawi hle. Kan khel ṭha tawk lo a, a nihna takah chuan chak duhin kan tuihal tawk lo deuh a ni," a ti a, a naute chu an rilru zawng zawnga inkhel turin a duh.