Leicester leh Burnley inhnehtawk

Champions League khelh tum Leicester City chu tun hnaiah an chesual fo a, team nem zawka ngaih Burnley nen 1-1 a an inhnehtawk avangin an elpui dangte tan anmahni hnaih theihna kawng an siamsak leh ta.

Turf Moor a inkhelah mual neitu lamin minute thumna lekah Matej Vydra hmangin goal hmahruai an khung a, chawlhlawk hma deuhin Kelechi Iheanacho chuan sutin goal dang a luh belh lo, point khat ve veah an lungawi a ngai.

Team pahnihin goal khung belh lo mah se hun ṭha chu an insiam thei. Foxes keeper Kasper Schmeichel-a'n James Tarkowski-a tauh leh Chris Wood khung tur a dansak a, Nick Pope pawhin hna thawh tur a nei nual.

Burnley defender Ashley Westwood leh Leicester midfielder Youri Tielemens ten an team chakpui theihna hun ṭha an nei ve ve a, mahse goal ban an tihper aṭangin goal neih belh thei zawk an awm lo.

Foxes hian an match hnuhnung zawkah Arsenal an ngam lo - Burnley an hmachhawn ṭum hian James Maddison bakah Harvey Barnes an chhawr thei lo a, striker Jamie Vardy-a'n thlawptu a nei ṭha tawk lo, nidang angin an tlarhma lam an hriam tawk lo deuh.

Leicester manager Brendan Rodgers chuan, "Hma taka goal kan chhuah kha a pawi, kha goal khan kan rilru huaisen tawk leh tawk loh a fiah. Si phurh kan sut thei a, khung belh theihna hun ṭha kan neih erawh kan vannei ta lo," tiin a sawi.

Burnley manager Sean Dyche chuan, "Schmeichel khelh ṭhat ni kan tawng a, a harsa ve bawk a ni. A khaikhawm nan chuan team ṭha tak lak aṭanga point kan hmu a nih chuan a lawmawm," a ti a, a naute chu chak phu zawk an nih thu a sawi bawk.

Premier League match 27 an khelh aṭangin Rodgers-a naute hian point 50 hmuin pathumna an ni a, palina West Ham aiin point ngain an sang zawk - Hammers hian match khatin an khel tlem thung. Burnley erawh point 29 nen 15-naah an awm.