A sang pathum an chak

Nilaini zan French Ligue 1 inkhelah champion tum pathum - Lille, Paris St-Germain leh Lyon te chuan an khingpui ṭheuh an hneh a, table-ah pakhatna aṭanga pathumna thlengin an intlar chhunzawm.

Hmahruaitu Lille leh Marseille an inkhel tawk hle a, hun tawp dawn lama Jonathan David goal hnih khung hmangin Lille 2-0 in an chak a, champion lai PSG lakah point hnihin an sang zel.

PSG pawhin chak turin vanneihna an mamawh. Pablo Sarabia goal khat hmangin Bordeaux 1-0 in an hneh hram. Paris club hian hliam vangin Neymar an la chhawr thei lo a, rawlthar duhawm Kylian Mbappe chu hrem vangin an chhawr thei lo bawk.

Pathumna Lyon pawh an chesual duh bik lo. An mikhual Rennes chu 1-0 in an hneh a, pahnihna PSG nen an inkarah point khat chauh a awm. Lyon hian April 25-ah hmahruaitu Lille an hmachhawn dawn.

Mauricio Pochettino naute pawh an hmabak a hautak dawn. March 21 hian Lyon an tlawh dawn, April 4-ah Lille nen an inkhel bawk ang. Argentine manager Poch chuan an khelh hmabak zawng zawng chu 'final' anga pawimawh vek a nih tawh thu a lo sawi tawh.

PSG manager Pochettino chuan, "Inthlahdah theih a ni lo, team dangin nomawi chawi tumin theihtawp an chhuah avangin keini tan pawh point hloh a thiang bik lo. Kan ṭhat dan berin khel thei lo mah ila kan mamawh tawk point kan hmuh theih avangin ka lawm," a ti.