Saina Nehwal a chak lo nghal

Tokyo Olympic qualifier zinga pakhat Swiss Open Super 300 tournament-ah Saina Nehwal chuan beisei a phak lo, a match hmasa berah Phittayaporn Chaiwan hneh loin a zinkawng a tawp nghal.

Nilaini inkhelah London Olympic bronze medalist leh Thailand nula an inbei tawk hle, minute 58 zet an inbeih hnuah Indian shuttler hi 16-21, 21-17, 21-23 in a vanduai zawkah a ṭang. Saina tan Olympic khel phak tur chuan inelna dangah chet ṭhat a ngai tawh dawn.

Inkhel dangah PV Sindhu erawhin hnehna a chang. World champion ni lai hian Turkish player Yigit Neslihan chu 21-16, 21-19 in a hneh a, a match hnihnaah Iris Wang nen inhmachhawn zui lehin result kan hre hman lo.

Mipa singles lamah Kidambi Srikanth, B. Sai Praneeth, Sourabh Verma leh Ajay Jayaram ten an khingpui ṭheuh an hneh a, player dang - H.S. Prannoy, Parupalli Kashyap, Lakshya Sen leh Sameer Verma te erawh an chak lo thung.