Vettel-a'n season thar a nghakhlel

Sebastian Vettel chuan a team thar Aston Martin chuan beiseina a siamsak thu a sawi a, season tharah Formula 1 inelna hmachhawn a chak thu leh a nghakhlel hle tih a sawi chhuak.

Red Bull car a khalh laiin midang chunga leng a ni a, beiseina sang tak nen Ferrari lamah insawm mah se a hlawhtling lo. Car sen a khalh lai hian tun hma lama Vettel kan hmuh ang kha a lantir thei lo, a contract a zawh hnuah Aston Martin a pan.

F1 champion vawi li ni tawh Vettel chuan, "Season liam ta kha kan thlir kir a nih chuan a lawmawm loh, hrileng bakah harsatna hrang hrang a thleng. Tun season erawh beiseina nen ka hmuak mek a, inelna tak neih ka chak tawh hle," a ti.

German star hian Mercedes chu team ṭha leh champion rinkai ber an nih thu a zep lo a, chutih rualin team dang tan pawh nomawi chuh ngam a nih thu a sawi bawk. Mercedes hian Lewis Hamilton an chelh avangin champion tura rinkai an ni dawn.

Vettel tan Aston Martin car khalh hi thil awlsam a ni lo mai thei, kum 60 zet a liam hnuin F1 huangah team an rawn nei ve dawn chauh a ni a, eng ang taka ṭha leh rinthlak nge an nih dawn a la hriat loh.