Fury leh Joshua an inhnek dawn - Bob Arum

Boxing promoter lar Bob Arum chuan Anthony Joshua leh Tyson Fury-ten inhmachhawn an remti niin a sawi a, boxer pahnih hian heavyweight boxing-a kawnghren lian pali chu an inchuh dawn a ni. 

Kum 32 mi Fury hian WBC heavyweight kawnghren a kawl mek a, Joshua hian IBF, WBO leh WBA title-a kawl thung - Arum sawi anga boxer pahnih hi an inhmachhawn a nih chuan heavyweight chanchina kawnghren lian tham pali, vawi khata an inchuh hmasak ber a ni ang. 

Fury promoter Arum chuan, "Team pahnih kan indawr a, fight thlentir ngei hi kan duh ve ve. Tunah chuan contract ziak a, engkim chingfel turin chak takin hma kan la mek - mahse, huaisen taka ka sawi ngam chu, ka thlirna aṭang chuan eng buaina tur mah a awm tawh lo," a ti. 

American promoter lar Arum hian inhnek a nih tur thu sawichiang viau mah se contract ziah a la nih miau loh avangin a hun leh a hmun erawh engmah sawi a la awm lo a, kar hmasa lawk khan Fury hian Joshua nena inhnek a harsat tur thu a lo sawi tawh thung!

Fury chuan, "He fight thlentir tur hian kum khat deuh tawp hun an nei a, kum khat liam ta leh tuna kan dinhmun hi a inang reng," tiin eng ruai an nih loh thu a sawi a, fighter lam ni loin Covid-19 leh fight thlentir tura ruahmanna kalpui ngai tam lutuk chu an buaina a nih thu a sawi bawk.