Bale-a hma hun chu Madrid zawt rawh u - Mourinho

Tottenham Hotspur boss Jose Mourinho chuan Gareth Bale-a hma hun chu amah neitu dik tak Real Madrid kuta a awm thu a sawi.

Portuguese manager hian media-a hmachhawnnaah, "Gareth-a hma hun in hre duh a nih chuan Madrid-a in journalist puite chu Real Madrid manager Zinedine Zidane hnena zawt turin hrilh rawh u," a ti!

Kum 31 mi Bale hian Spurs-ah season khat hun hmang turin loan-in a khel mek a, Santiago Bernabeu lamah kum khat dang cham turin contract a la nei a ni. 

Mourinho chuan, "Bale hi Spurs player a ni lo a, engkim hi Real Madrid kuta awm a ni. Kei chuan loan-in player pakhat ka kawl a ni mai a, chu chu Tottenham tana a ṭha thei ang bera hman ṭangkai ka tum mai a ni," tiin a sawi. 

Real Madrid boss hlui chuan sawizawmin, "Loan-a kan lakluh player-te chu keimahni tan piahlamah, loan-a min hawhtir phaltu club-te zahna avangin duat taka enkawl kan tum a ni," a ti.

Bale hian nipui transfer lai khan khup hliam nei sa chungin Spurs hi a zawm a, beisei anga a khelh lawk loh hnuah tun hnaia a match hnuhnung pahnihah goal thum a khung a, tun season inelna hrang hrangah match 20 khela goal riat khungin assist vawi thum a nei tawh. 

Mourinho chuan, "Player-in hliam a neih chuan a mimal takin a nghawng na a, anmahniah ser a awm ṭhin. A chang chuan chu ser chu tisa lam ni loin rilru a nih chang a awm a, hei vang hian player inhliam tan ngai awh leh tur chuan hun a duh rei ṭhin. 

"Dawhtheih a ngai em em a ni. Kan theihtawpin kan enkawl a, a tawp thlengin chutiang chuan kan ti ang. A ban phakah engkim kan dah a, coaching staff, medical staff, sports science engkim a awm vek. 

"Chuvang chuan a hlim a, mahse, level sang taka a duh anga a khelh loh avangin a hlim tluantling lo thung. Tunah erawh level sang takah ṭha takin a khel tawh a, a hlimin nuam a ti a, fel takin kan inenkawl zel theih ka beisei," tiin a sawi. 

Nizan khan Spurs hian Fulham an lenchilh a, he thu buatsaih a nih lai hian result kan hre hman lo.