Football hmel hmang a dang dawn - FIFA president
FIFA president Gianni Infantino chuan coronavirus vanga inkhelh theih a nih loh hnuah football hmel hmang a danglam tur thu a sawi a, tun season kal lai mek khelh chhunzawm hun tur hriat theih a nih loh thu a sawi bawk.
Covid-19 vangin khawvel hmun hrang hranga football league tam zawk chawlh a ni a, kar liam ta khan Infantino hian season hman zawh a nih theih nan inelna ṭhenkhat paih a nih tur thu a sawi.
April 2 khan 72nd Ordinary CONMEBOL Congress-ah video hmangin FIFA President hian thuchah a sawi a, Infantino chuan, "Football hi a pawimawh ber a ni lo a, hriselna a pawimawh hmasak avangin Covid-19 kan hneh hma chuan kan ngai pawimawh hmasa tur a ni," tiin a sawi.
FIFA president Infantino chuan sawi chhunzawmin, "Inelna hi ṭan thuai kan duh vek a, amaherawhchu kan ṭan hun tur kan hre thei lo. Tun hma kan inkhelh dan ang khan kan kalpui leh thei ang em tih pawh hriatthiam a har.
"Inelna ṭan tur chuan medical lama thuneitute leh sorkar thutlukna ngaih pawimawh hmasak a ṭul a, eng match mah hi mihring nunna aia pawimawh zawk a awm lo. Khawvel hi a ngai rengin a kal thei dawn lo a, football pawh a danglam lo. Football thuneitu kan nihna angin a kal zel dan tur erawh kan ngaihtuah ang," tiin a sawi.
Belgium rama football inelna sang ber Belgian Pro League chu inelna sang zinga Covid-19 vanga 2019-20 season titawp hmasa ber an ni a, hmahruai mektu Club Brugge chu champion-a puan an ni.