Rangers tan champion a hnai zel

Steven Gerrard enkawl Rangers chuan 1-0 in Livingston an hneh a, league match sarih khelh tur an la neih aṭangin point li an hmuh chuan Scottish Premiership champion an ni ang.

Rangers tan Alfredo Morelos chuan inkhela goal awmchhun hi minute 87-naah a khung a, goal dang a luh tawh loh avangin Gerrard-a enkawl team an champion. 

Liverpool legend Gerrard hian mual sira ding chungin yellow card vawi hnih a hmu a, hnawhchhuah a ni - striker Morelos chu referee-in tlu dera ngaiin yellow card a pe a, hei hi Gerrard chuan hrethiam loin a tawrh phah ta a ni. 

Inkhelh zawhah Gerrard-a insum lo - player a nih lai pawha a ṭul huna sual thiam tak midfielder chuan, "Hetiang ang level-a ka hriatthiam loh chu mi pathumin a inang veka tihsual an nei thei hi a ni. Hla taka ding pawhin ka hmu thei a, anni erawh hnai taka hmutu an ni. 

"An vai khan an tisual vek a, kha kha awlsam taka pai dam ka tum lo. Referee John Beaton kha a thutlukna sawifiah turin ka ti a, mahse, min be duh lo. Hemi kan sawi hian game level sang taka official chungchang a ni kan sawi ni," a ti!

Rangers hian league match 31 aṭangin point 85 an nei mek a, match 27 chak tawhin vawi li an draw a, tlawm an la nei lo - anmahni hnaih bertu Celtic chuan match 31-ah point 67 chiah an nei thung.