Arteta enkawl Arsenal inlan hun
Zanin hian Europa League last 16 lut tur chinfel a ni dawn a, first leg lama che fuh Arsenal leh Inter Milan te chu tlang tura rinkai an ni. Premier League dang Wolverhampton Wanderers chu Espanyol lakah si li faia hmahruai fal thei an nih avangin tlang chiang tawha ngaih an ni bawk.
Rinkai Arsenal
Hun tawp dawn lama Alexandre Lacazette goal hmangin Arsenal hian first leg-ah khan Olympiacos hi 1-0 in an luhchhuah a, tlang turin goal venhim a tawk - chutih rualin tun hnaia Mikel Arteta hnuaia an khelh dan thlirin Gunners hian goal tam zawk khung an tum a rinawm.
Gunners manager Arteta chuan, "Khualmuala goal khung hi chu dinhmun siam nan a ṭha hle, mahse inelna hi a la zo lo a ni tih erawh chiang taka hriat a ngai," tiin a sawi. Spanish manager hian chetsual theih a la nih zia a hre chiang hle.
North London club hian an league match hnuhnung berah Everton 3-2 in an hneh a, an phur vanglai a ni. Mahse, defender Sead Kolasinac chu hliam vangin an chan, nipui laia an lei Kieran Tierney chu hliam vangin chhawr theih a la ni lo a, rawlthar Bukayo Saka hmel kan hmu leh ang.
Olympiacos-in Arsenal an tlawh hnuhnung paliah vawi khat chiah hnehna an chang thei. Record an neih ṭhat loh avangin rin an hlawh lo a ni mai thei, mahse 2016 khan Champions League group stage-ah 3-2 in an luhchhuah theih avangin beisei chu an nei thei ang.
Entu nei lo Inter
Italy ramah coronavirus a leng mek a, hei hian nghawng lian tak a nei. UEFA leh club pahnih Inter Milan leh Ludogorets te bakah Italy sorkar an in be rawn a, zanin San Siro-a inkhel turah fans an awm dawn lo.
Antonio Conte-a'n a player ṭha ṭhenkhat hawhchawlhtir chungin khualmualah 2-0 in hnehna a chanpui thei, zaninah pawh Serie A lama a chhawr rim ho chu an inlan a rinawm loh - Pathanni zanah Italian champion Juventus nen an inhmachhawn zui leh dawn a ni.
Inter defender Diego Godin chuan, "Europa League khel turin kan inbuatsaih, kan hmaah inkhel pawimawh a inchhawp chho mek a ni," a ti. Atletico Madrid defender hian nipui bazar lai khan Inter hi a zawm a, match 24 khelhsak tawhin player pawimawh a ni phak.
Inkhel dang
Wolverhampton Wanderers-in Espanyol (4-0) an sawp hnuah Norwich City (3-0) an sawp zui zat a, coach Nuno Espirito Santo naute boruak ṭhat vanglai a ni. Santo hian Pathianni zana Tottenham nen an inkhelh tur thlir chunga player a khek a nih pawhin a mak lo ang.
Season hmasa Champions League semifinalist Ajax chu tla thei dinhmunah an ding mek. Dutch club hian tlang tur chuan khualmualah Getafe chu goal thum chin tala an hneh a ngai, kawng a hautak tawh hle.
Last 32 Second Leg
Espanyol 11:25 PM Wolves (0-4)
Istanbul Basaksehir 11:25 PM Sporting CP (1-3)
Porto 11:25 PM Bayer Leverkusen (1-2)
Basel 11:25 PM APOEL (3-0)
LASK 11:25 PM AZ (1-1)
Malmo FF 11:25 PM Wolfsburg (1-2)
Gent 11:25 PM AS Roma (0-1)
Ajax 01:30 AM Getafe (0-2)
Celtic 01:30 AM Copenhagen (1-1)
Sevilla 01:30 AM CFR Cluj (1-1)
Arsenal 01:30 AM Olympiacos (1-0)
Manchester United 01:30 AM Club Brugge (1-1)
Inter Milan 01:30 AM Ludogorets (2-0)
Salzburg 01:30 AM Eintracht Frankfurt (1-4)
Benfica 01:30 AM Shakhtar Donetsk (1-2)
Sporting Braga 10:30 PM Rangers (2-3)