Bayern-in Boateng pawisa chawitir
Bayern Munich chuan an defender Jerome Boateng chu club phalna la hmasa loa Munich khawpui a chhuahsan avangin pawisa an chawitir a, a pawisa chawi zat hi tarlan ni lo mah se damdawi inah ṭanpui ngaite tan an pe nghal.
German champion chuan thuchhuah siamin, "Coronavius vangin mitin pawn chhuak lo tura inzirtir lai a ni. FC Bayern pawh sorkar thupek zawmin kan inkhung, player-te hi midang entawn tlaka awm turin kan duh," tiin an sawi.
Kum 31 mi Boateng erawh a thil tihah a inchhir lo. Leipzig-a awm a fapa kum li mi chauh chuan a damloh thu a pa hi a hrilh a, hri leng pawh ngaihtuah tawh loin a fapa hmu tur hian Munich aṭangin a kal.
German defender chuan, "Club ka hrilh hmasak loh avang khan ka ti dik lo tih ka hria, mahse kha tih hunlai khan ka rilruah ka fapa bak thil dang a awm lo a ni.
"A hriselna dinhmun kha a ṭha lo a, eng hun pawh ni se fapa damloin a pa a ko a nih chuan ka kal mai turah ka ngai. Amah vang chuan eng hremna pawh tuar ila ka pawm, ka fapa a ni tlat," tiin a sawi.
Leipzig aṭanga Munich a pan letna lamah Boateng hi car chetsualnaah a inhnamhnawih bawk.