Wimbledon hotupa a hlauthawng
Wimbledon chief Richard Lewis chuan Covid-19 vanga tennis buai mek a thlir a, tun season chhungin inelna an nei thei tawh lo mai ang tih a hlauhthawn thu a sawi chhuak.
Tennis season kal lai hi coronavirus vangin chawlh mek a ni, an chawlh hun chhung hi vawi hnih an pawtsei tawh - tunah chuan July 13 thleng an chawl dawn. Indopui pahnihna hnua a vawi khat nan Wimbledon pawh an ṭhulh hial a ni.
All England Club chief executive Lewis chuan, "Kuminah tennis kan khel leh ngei ang tih hi ka sawi chiang ngam lo. Mahse, duhthusamah chuan a rang thei ang bera inelna neih leh theih hi ka duhdan a ni, tumah hian eng nge lo thleng tur erawh kan hre si lo.
"US Open bakah inelna neih hun an sawn French Open te khel thei ngei se ka duhsak. Grand Slam bakah hian Masters leh inelna tenau deuh zawka ngaih te pawh khelh theih a duhawm hle," a ti.
Wimbledon khel dawn lo mahse US Open erawh August 31 aṭanga khelh theih an la beisei reng, New York khawpuia inelna an neih zawh aṭanga kar hnih hnu lekah Paris lamah tournament lian khelh beisei a ni mek.
Spanish tennis federation (RFET) president Miguel Diaz chuan, "Beisei ngam loh, mahse beisei loh theih loh thil a awm. Kum tawp lam thla li chhung tal hi chuan tennis inelna kan neih leh theih ka beisei," tiin a lo sawi ve tawh bawk.