Clippers chak ve leh ta
Los Angeles Clippers chuan an match hnuhnung pathuma an tlawm hnuah chak ni hmel an hmu ve leh ta. Nimin zing NBA regular season inkhelah Clippers hian Memphis Grizzlies chu 124-97 in an hneh.
Kawhi Leonard-a'n point neih tuma vawi 17 a shoot zinga 10 a hlawhtling a, point 25 hlawh chhuakin hnehna an chan theih nan a thawh hlawk hle. Bench aṭanga lut Montrezl Harrell chuan point 22 ngawt a nei ve bawk.
Inkhel dangah Joel Embiid chuan Philadelphia 76ers tan point 49 a nei a, basketball a khelh china match khata point a neih hnem ber ṭum hian rebound vawi 14 la bawkin a club hi Atlanta Hawks lakah 129-112 in hnehna a chanpui.
Nimin zing Inkhel dangah Los Angeles Lakers tan LeBron James a vul zel. James hian season kal laia a point score hnem ber ṭum tawngin point 40 a nei a, a team hi New Orleans Pelicans lakah 118-109 in hnehna a chanpui.
NBA champion vawi thum ni tawh hian 3rd quarter bikah point 16 ngawt a nei thei a, a teammate Anthony Davis-a'n point 21 a neih bawk avangin Lakers chakna hnar an ni chhunzawm.
Lakers hian tun hnai an match hnuhnung parukah hnehna an chang vek a, regular season kal laiah match 44 chak tawhin vawi 12 an tlawn - Western Conference hmahruaitu niin playoff khel turin an dinhmun an sawhnghet zel.
Eastern Conference lama hmahruaitu Milwaukee Bucks chuan NBA champion lai Toronto Raptors chu 108-97 a hnehin tun season bikah vawi 50 an chak tling ta. Bucks hi playoff khel turin an tling der tawh a ni.
NBA Nimin Results
Indiana Pacers 119 - 80 Charlotte Hornets
Toronto Raptors 97 - 108 Milwaukee Bucks
Chicago Bulls 122 - 124 Oklahoma City Thunder
Denver Nuggets 115 - 98 Detroit Pistons
Los Angeles Lakers 118 - 109 New Orleans Pelicans
Portland Trail Blazers 106 - 118 Boston Celtics
Golden State Warriors 94 - 112 Sacramento Kings