Ruahsur! New Zealand leh England chak

Cricket World Cup-ah Zirtawpnia Pakistan leh Sri Lanka inkhel tur chu ruahsur vangin ṭhulh a ni a, point khat ve ve an insem. Inrinniah erawh ruahsurin inkhel a tibuai lo a, New Zealand leh England-in an khingpui Afghanistan leh Bangladesh an sawp.

County Ground, Taunton-ah Afghanistan-in run 172 chauh an siam thei a, New Zealand-in wicket thum hlohin over 32.1-ah an target hi umphain wicket sarihin an chak. Cardiff Wales Stadium-ah England-in wicket ruk hlohin run 386 zet an siam a, Bangladesh tan target a tam mah mah - over 48.5-ah run 280 chauh siamin inelna thlengtu run 106-in an chak.

Bristol-ah ruah a sur nasat avangin ball khat pawh vawm a ni lo. Pakistan leh Sri Lanka te inkhel hi tun World Cup-a inkhelh ṭhulh hmasak ber a ni a, World Cup history-a a vawi thum thlenna chauh a ni.

Zan dar 6:30 thleng pitch khuh a ni a, umpire ten vawi hnih pitch an endik hnuah inkhelh tlakna turah an ngai lo. Tun World Cup-ah ruahsur vanga inkhel vawi hnih a buaina a ni a, Cardiff-a Sri Lanka leh Afghanistan inkhelh ṭumin team pahnih vuak tur zat chu over 41 ve veah an titlem.

Pakistan captain Sarfaraz Ahmed chuan, "England kan hneh zawhah phur leh inrintawkna nasa tak kan nei a, khelh kan duh takzet," tiin an khel thei lo chu pawi a tih thu a sawi.

England-in Pakistan an hneh loh hnuah an tho chhhuak lehnghal a, Bangladesh lakah an ṭhatna tak an pholang. Inelna thlengtu tan hian opener Jason Roy chuan run 153 zet a vaw chhuak a, England hian run 386/6 zet siamin World Cup history-a England-in run an siam tam pahnihna a ni.

Roy bakah hian Jonny Bairstow (51), Jos Buttler (64)  leh Eoin Morgan (35) te an che ṭha a, wicket hmasa ber an hloh hian run 128 an siam tawh avangin chak turin harsatna an nei lo. Bangladesh tan Shakib Al Hasan-a'n century (121) siamin an mualpho tur a chhanhim. Pakistan laka che chhia England bowler Jofra Archer pawh rawn insiamṭhain run 29 chauh pein wicket thum a la.

New Zealand bowler te an che ṭha zel a, Afghanistan batsman ten an ngam lo hle. Kum 29 mi Jimmy Neesham chuan wicket nga lain run 31 chauh a pe a,  Lockie Ferguson pawhin run 37 pein wicket li a la ve bawk.

Afghanistan hian over 41.1-ah run 172 chauh siamin an thi vek a, New Zealand tan chak turin harsatna an tawk lo. Captain Kane Williamson chuan thi loin run 79 a siam a, over 32.1 lekah an target hi an umpha. Black Caps hi match thum an khelh tawhah an la chak vek a, June 13 , Ningani hian India nen an inhmachhawn ang.

Vawiin tlai dar 3:00 hian chak la nei lo South Africa leh West Indies te an inkhel dawn a, Rose Bowl Cricket Ground-ah Proteas hi an chak zo lo a nih chuan semifinal luh a harsa tawh ang. Windies erawhin Australia hneh lo mah se an match hmasa bera Pakistan an sawp avangin an la khel ṭha thawkhat tiin a sawi theih.