Thailand ngamtu India pathumna

India-in kut ruaka King's Cup hawsan an duh lo. Inrinni chhun khan an match hnuhnung berah inelna huaihawttu Thai­land chu 1-0 in an hneh a, pa­thumna an ni. 

Blue Tigers tan Anirudh Tha­pa chuan he inkhela goal awmchhun hi a khung a, Thailand-in a chhanletna tur zawng mah se minute 90 chhung­in an hlawh chhuak thei lo. War Elephants-in (Thai team sawina) anmahni huaihawt inelnaah ngam an neih loh avangin team pali zingah a hniam ber an ni a, tun hnai thla ruk chhunga India an hmachhawn pahnihah an tlawm ve ve bawk. 

Inrinni zanah final khelh nghal a ni bawk a, 3-1 a India ngam tawhtu Curacao chuan Vietnam hnehin an champion. Team pahnih hi hun pangngaiah 1-1 in an inhnehtawk a, penalty-ah 5-4 in Curacao an chak. 

India coach Igor Stimac-a'n inkhelh hmain player a siksawi tur thu a sawi lawk a, pathumna nih inchuh inkhel hi player 'enchhin' nan a hmang. 

Stimac thutlukna avangin Lal­lianzuala Chhangte chu bench-ah dah a ni a, Curacao hmachhawn India team aṭangin starting XI-ah ringawt pawh player pariat thlak danglam an ni. Goalkeeper rinrawl Gur­preet Singh Sandhu meuh pawh bench-ah dah a ni a, a aiah Amrinder Singh chuan si ban a nghak. India captain Sunil Chhetri pawh bench-ah a awm a, Sandesh Jhingan chuan captain armband a hreng. 

Adil Khan, Anirudh Thapa, Vinit Rai, Farukh Choudhary, Balwant Singh, Amarjit Singh leh Raynier Fernandes ten bul an ṭan vek bawk a, India hi 'team thar' tia sawi theih a ni. 

A hming Anirudh 

Asian Cup-a India-in 4-1 a Thailand an sawp ṭum khan Anirudh Thapa chuan India goal thumna a khung a, legendary football commentator John Helm leh Paul Masefield te ṭhu dun chuan hahipin an fak.

"Karlehah kum 21 a tling dawn chauh maw? A va mak zawk em - a hma hun zawng a eng chiang a  ni," tiin an sawi a, an sawi sual lo. Thailand lakah a hmuhnawm a, goal a khung leh ta. Thapa goal khung hi minute 17-naa lut a ni a, freekick aṭanga ball kal chu Adil Khan-a'n Thapa tan a siamsak a, Chennaiyin midfielder hian harsatna nei loin goal-ah a chantir. 

Thailand tan captain Teera­sil Dangda chuan chance vawi tam nei mah se a vanneih ṭum a ni lo a, a khung chhun lah offside vangin pawm a ni lo. Thai chhuanvawr Theerathon Bunmathan chuan anmahni goal ban a tih per bawk a, a tawpah 1-0 in India an chak. 

April 2018 khan India chuan hmasawn a tumna kawng­ah Thailand chu friendly match khelhpui turin a sawm a, Thailand hian India chu an 'level' puiah ngai loin sawmna an hnawl. 

Thailand-in India hnu­chhawn­in China an hmachhawn zui a, Thailand-in heti taka Blue Tigers an en hniam hi Indian football team tan a na a, theihnghilh theih a ni lo. Mahse, Asian Cup 2019 a herchhuah meuh chuan India-in group stage-ah 4-1 zetin Thailand an sawp a, Mizo tlangval Jeje Lalpekhlua chu goal khungtu zingah a tel.

Thailand rilru a dam thei lo. King's Cup khel turin India an sawm a, an intawng leh ta ngei - 'B' team tia sawi theih khelhtir chungin India-in an bu zawlah ngei Thailand an tlawm nawn leh sak a, Asian Cup-a an chak chu tihpalh thil a ni lo tih an lantir.