Mizoram Taekwondo team hlawhtling

3rd Kukkiwon Cup Taekwondo Championships chu June 5-7 chhung khan New Delhi-ah khelh a ni a, Mizoram team chuan point 114 hmuin a pumpuiah pahnihna an ni - inelna thlengtu Delhi chuan point 123 hmuin a chung berah an awm thung.

Mizoram Team hian poomsae (form) inelna huangah gold medal 18, silver medal pathum, bronze medal pakhat an la. Kyorugi (fight) inelna huangah gold medal panga, silver medal pali leh bronze medal pahnih an la a, Gyokpa (breaking) inelnaah silver medal an la bawk.

Nikum khan Mizoram hi team champion an lo ni tawh a, kuminah beisei ang tak phak lo mah se an hlawhtling thawkhat hle. Kuminah team 139 telin India bakah ram pawn - Afghanistan, Kuwait, Korea, Nepal aṭangin team an tel a. 

Mizoram Team hi master Joseph Thansanga (head of team), Electric Veng leh R. Lalrinmawia (manager), Republic Veng bakah coach Lalsangzuali, Venghlui ten an hruai. Lalnunhlima, Serchhip leh Vanlalhmangaihthangi, Armed Veng pawh referee official-in an kal bawk.