French Open champion Ashleigh Barty

Ashleigh Barty chuan Czech tleirawl Marketa Vondrousova hnehin French Open nomawi a chawi a, Australian nula hian a Grand Slam hmasa ber a lak hnuah cricket chawlhsana tennis a khel chu a thutlukna siam fuh ber a nih thu a sawi!

Inrinni zan Court Philippe Chatrier-a French Open hmeichhe singles final-ah Barty hian darkar khat leh minute 10 chhungin 6-1, 6-3 in hnehna a chang a, kum 19 mi Vondrousova-i'n beiseina sang tak nen Roland Garros title a beiseina a thamral ta rih.

April 1996 khan Ipswich, Queensland-ah Barty hi a piang a, naupang harhvang leh infiamna ngaina tak a ni. A naupan laiin tennis a tuichilh nghal a, mahse 2015-16 chhung khan a tuina pakhat zawk 'cricket' a khel daih! Women's Big Bash League-ah Brisbane Heat tan a khel.

Amaherawhchu, a hmangaih hmasa tennis chu a thinlungah a thi thei lo. 2016 khan tennis huangah bawk a kir leh a, a hnu lamah chuan a hawikir tawh lo - tunah chuan Margaret Court (1973) hnua Australian nula zinga Roland Garros champion leh thei hmasa ber a ni.

Kum 23 mi Barty chuan, "Paris khawpuiah hian French Open nomawi nen ka ṭhu ve ang tih hi ka suangtuah phak ngai lo, tennis huanga ka kir leh hi ka hringnuna ka thutlukna siam fuh ber a ni. Ka thinlungah tennis tan kawng ka khar ngai lo a, tunah chuan dai ngai loh ka dai ta a ni," tiin a sawi.

Infiamna huang a sawn avangin Barty-i'n tennis a khelh leh hnuah ranking sang a nei nghal thei lo, world ranking a hmuh hmasak chu number 623 a ni - tuna ranking chhuak tharah chuan number 2 dinhmun a luah thei hial dawn.

Tennis a khelh leh aṭangin nomawi pali a chawi leh tawh a, kumin March thla khan Miami Open title lain, nikum khan Grand Slam hnuhnung ber US Open doubles huangah an champion bawk. Hmeichhe tennis bikah Serena Williams hnuah roreltu nghet an awm thei ta rih lo. 

Kumina inelna lian chi hrang hrang - Australian Open (Naomi Osaka), Dubai Tennis Championships (Belinda Bencic), Indian Wells (Bianca Andreescu), Miami Open (Ashleigh Barty), Madrid Open (Kiki Bertens), Rome Masters (Karolina Pliskova) leh French Open (Ashleigh Barty) ah te player hran zel an champion - Barty hi champion kawp thei awmchhun a ni.