ISL league round khelh zawh a ni ta

India rama football league inelna sang ber Indian Super League-ah league round khelh zawh a ni a, match hnuhnung berah NorthEast United leh Chennaiyin FC chu 2-2 in an inhnehtawk. 

Indira Gandhi Athletic Stadium, Guwahati-a inkhelah Aizawl FC defender hlui Masih Saighani chuan Chennai club tan minute 17-na lekah goal hmahruai a khung a, team talbuai Highlanders hi an tlawm mai a rinawm. 

Mahse, Chennaiyin left back Tondonba Singh chuan midfielder Ninthoi a ti tlu a, red card a hmuh bakah penalty a chawi - Martin Chaves chuan goal-ah a chantir a, minute 71-naah goal hnihna a khung leh bawk. 

Player kim loa khel Chennaiyin an tlawm dawn niin a lang a, mahse a hun takah Mizo tlangval Lallianzuala Chhangte a inlar. Tun season-a Indian player 'hot' ber pawl hian injury time-ah si phurh sutna goal a rawn khung a, 2-2 in inkhel a tawp.

Semifinal an luh chian tawh avangin Chennaiyin boss Owen Coyle chuan NorthEast United lakah player lut tam lo zawk ho bul a ṭantir a, Jerry Lalrinzuala, Lallianzuala Chhangte leh Laldinliana Renthlei-te chu bench-ah a dah vek. 

Mahse, Bolton Wanderers boss hlui hian bench aṭangin Mizo trio-te hi a luhtir leh vek a, table-a pathumna dinhmun luah an tumna erawh an tlin ta lo. 

Chennaiyin hian palina nichungin season an khar a, semifinal-ah chuan league-a point hmu sang ber FC Goa nen an intawng ang. 

NorthEast United hi an ṭhat dan berin an khel bik lo. Aizawl FC coach hlui Khalid Jamil chuan player ṭha leh khelhna hmun chang tam lo a chawh pawlh a, player regular zinga bul ṭan zingah Lalengmawia a tel. 

Aizawl FC goalkeeper hlui Soram Poirei chuan Mizo club tan si ban a nghak a, Lalrempuia Fanai, K. Lalṭhathanga leh Alfred Lalruotsang te chuan bench lamah hun an hmang thung. 

Alfred hi kar hmasaa Hyderabad FC nen an inkhelh khan bench aṭanga luhtir a ni a, kum 16, thla sarih leh ni 29 mi niin ISL-a player inlan thei naupang ber a ni - kum 17, thla li leh ni 10 mi nia record lo siam tawh ATK forward Komal Thatal record chu a khum. 

Jamil-a'n Robert Jarni ban vanga coach lailawk hna a chelh hnuah match thumah a team a kaihruai a, player enchhin nan a hman avangin point khat chiah a hlawh chhuak.