French Open Chmapion Rafael Nadal

Court Philippe Chatrier-ah Rafael Nadal-a'n French Open nomawi a fawp vawng vawng a, lawm avanga a bianga mittui luang chuan Spanish tlangval thinlung a sawifiah. Nadal chu tennis player dangte la tih ve theih ngai loh Grand Slam mala vawi 12 champion thei hmasa ber a ni ta.

Pathianni zan Roland Garros final hmuhnawm takah champion lai Nadal-a'n Dominic Thiem chu 6-3, 5-7, 6-1, 6-1 in a hneh a, nikum final-a a hneh tawh hneh nawn leh tur hian darkar thum leh minute khat chiah hun a hmang.

French Open nomawi a chawi hmasak ber 2005 aṭanga a title 12-na la tur hian ni 5,117 a mamawh a, Paris khawpuia a record hnaih bertu Bjorn Borg (6 titles) chuan a phak lo hle, a let thawkin a champion hnem zawk a ni.

Kum 33 mi Nadal hian Grand Slam nomawi 18 a chawi tling ta a, a chungah Roger Federer (20 titles) chiah a awm - Swiss thiampuipa hi kum 37 mi a ni tawh. Player ropui pahnih hi hliam loa an khel zel thei a nih chuan record ropui zawk an hnutchhiah chhunzawm theih a rinawm.

Tennis inelna sang ber Grand Slam an khelhna hmun hi a inang lo fur hlawm. Australian Open leh US Open te hard court-ah an khel a, grass inelna lian awmchhun chu Wimbledon niin French Open chauh hi clay court-a an khelh a ni thung.

Clay court-ah hian ball kal a muang deuh bik a, ball a sawt (bounce) sang bik bawk. Nadal tan chuan heng ball kal dan hi duhthusam a ni. Seeded palina Thiem nen final an khelh ṭum pawh hian Nadal-a'n ball a vaw sawt nasa a, a khingpuiin a dar (shoulder) vela vuak turin a pe phei hnem.

Player tam zawk tan kawng (waist) chen vel hi vuak nuam a ni, a aia sang emaw hniam chu vuak a harin thahrui a heh bawk. Final set hmasa pahnihah Nadal-a'n sang tak taka ball vaw virin (spin) a khingpui a chaih chau a, inkhel tawp lamah semifinal leh quarterfinal-a thahrui hmang hnem zawk Austrian player a zuih phah.

Clay court-a a inkhelh thiam em bik vanga 'King of Clay' tia hming lem an vuah sak Nadal-a'n French Open-ah hian match 95 hnehna a chang tling ta a, vawi hnih chiah chak loh a nei. Nomawi a chawi tawh zawng zawng 82 zinga 59 zet chu clay court inelna huanga a hlawhchhuah a ni.

French Open chauh hi major tournament pali zinga an khelhna hmun pui bik (main court) chung khuhna awm lohna hmun a ni a, Court Philippe Chatrier pawh a chung khuhna siam tura ruahmanna kal mek a ni.

Fur lai a ni a, ruah tla leh thli thaw nasa vangin inkhelh hun sawn leh tihkhawtlai a awm fo. Nadal-a'n sik leh sa vanga buaina nei loin semifinal a paltlang a, a khingpui Thiem erawh world number 1 Novak Djokovic nen an intawn ṭumin an inkhel zo thei lo a, Inrinni zana an inkhel pawh ruah sur vangin a khaihlak bawk.

Kum 25 mi Thiem hi clay-a inkhel thiam tak a ni ve tho a, final inkhel tir lamah pawh Nadal a chhaih buai hle. Mahse, French Open-a Nadal 'meuh' hneh tur chuan tharum a ngah loh bakah a rilru a paukhauh tawk lo - Djokovic nena match an khel rei lutuk leh inelna tir lama set a hloh hnem pawina a hre chhuak ang.

Austrian tlangval chuan, "Khawvel player ṭha berte zinga mi Novak ka hneh thei kha ka hun tawn ropui a ni a, darkar 24 pawh a liam hmain legend ka hmachhawn a ngai leh si. Clay court lalpa nen kan inhmachhawn miau avangin ka duhthusam chu a la puitling thei rih lo," a ti. Nadal chuan Thiem chu player ṭha a nih thu leh Grand Slam nomawi a la chawi theih ngei a beisei thu a sawi ve bawk.