Nations League champion hmasa ber Portugal

Inelna thlengtu Portugal chuan Pathianni zan khan Netherlands chu 1-0 a hnehin Nations League champion hmasa ber an ni. Estadio do Dragao-ah Goncalo Guedes chuan minute 60-naah goal awmchhun a khung a, Cristiano Ronaldo captain-na hnuaia khel Portugal hian kum thum chhungin nomawi pahnih an chawi.

Kum 2004 khan rawlthar duhawm Ronaldo telna Portugal chuan Euro C'ship final-ah Greece hneh loin an tlawm a, inkhelh banah Ronaldo hi hnem theih a ni lo. Tun ṭumah erawh inelna thlengtu Portugal an chesual nawn lo a, Ronald Koeman hnuaia intuai thar Netherlands an hneh.

Portugal hi an player neih dan thlirin Europe-a football thiam ber ram tih tur an ni lo a, khawvel huapa lar Eusebio leh Luis Figo te an kawl lai pawhin an champion thei lo. Amaherawhchu, Europe-a player ṭha ber Ronaldo an neih hnuah major tournament-ah ṭum hnih nomawi an chawi ta.

Final bikah erawh Ronaldo aiin Bernardo Silva a khel ṭha zawk a, Manchester City midfielder ball pass chu Goncalo Guedes-a'n goal-ah a chantir. Netherlands chance neih ṭhat ber erawh Memphis Depay-a'n goal-ah a chantir thei lo.

Semifinal-a hattrick siamtu Ronaldo chu goal khung tam ber niin Alipay Top Scorer Tropy a dawng. UEFA technical observer-te chuan Bernardo Silva chu player of the tournament-ah an thlang a, Frenkie de Jong chu young player of the tournament-ah thlan a ni.