Pathianni zan dar 10-ah Manchester Derby

Manchester Derby chu Pathianni zan dar 10:00 hian Etihad Stadium-ah khelh a ni dawn a, Manchester City leh Manchester United inkhel tur hi 'top of the table clash' a ni tel bawk.

Pep Guardiola hoten point 65 an hmu tawh a, Ole Gunnar Solskjaer-a hoten khelh zat inangah point 14-in an pha lo. Man City hi inelna hrang hrangah match 21 chhung an chak zawn tawh a, tun hmain Man United manager hlui Sir Alex Ferguson-a'n ṭhenawm bengchheng ti lekin sawi mah se tunah chuan team ṭha zawk an ni tawh a ni.

Manchester City-in defender Nathan Ake chiah inhliam an nei a, Guardiola-a'n a duh thalin player a thlang thei dawn tihna a ni. City hian player langsar Kevin De Bruyne leh Sergio Aguero te inhliam lai pawhin hnehna an chang tho a, an dam kim hnu phei hi chuan an tawrhlehawm lehzual.

City-in match hnuhnung bera Wolves an sawp ṭumin John Stones, Sergio Aguero, Fernandinho leh Phil Foden te hahchawlhna hun pek an ni a, derby match atana ruahmanna pakhatah a ngaih theih. 

Guardiola chuan, "Liverpool champion lai an ni a, nomawi kawltu an ni. Keini hi champion turin kan dinhmun a ṭha a, mahse kan la champion lo. Tun dinhmunah chuan Manchester United chiah kan ngaihtuah," tiin derby match khelh tur a ngaih pawimawh thu a sawi.

Pep Guardiola hote hian match 21 chhung an chak zawn tawh bakah match 28 chhung hneh loh an tawng tawh lo a, league match hnuhnung 10-a vawi thum chauh chak Man United tan tawh an khirh khawp ang.

Man United keeper Dean Henderson-a'n loan hmanga a khelhna Sheffield United-ah a che ṭha a, first keeper chan tumin Old Trafford-ah a let. English keeper hian David de Gea a nek chhuak thei lo a, amaherawhchu Spanish keeper hi chhungkaw thil avangin tun thla chhung a inlan tawh hmel loh.

Henderson hian Crystal Palace nen an inkhelh ṭumin bul a ṭan a, goal a chhuah lo. Man City lakah English keeper hian fiahna a hmachhawn zui dawn a, tuna a hun ṭha neih hi a hmang ṭha a nih chuan United first keeper chauh ni loin England tana khelhna theihna kawng thlengin a inhawng thei ang.

Solskjaer-a hoten Man City an hmachhawn dawn miau avangin tlarhnung an pawimawh dawn a, chutihrualin hnehna chang tur chuan match thum chhung goal khung tawh lo Man United tlarhmate an chetṭhat a ṭul dawn a ni.