Zaninah WBC World Super Featherweight C'ship Lalrinsanga Vs Eric Quarm

World Boxing Council Youth World Super Featherweight title inchuhna chu Mizoram chhungah ngei neih a ni dawn a, zanin dar 8:00 hian Mizo boxer Lalrinsanga Tlau leh Ghanaian boxer Eric Quarm te R. Dengṭhuama Indoor Stadium-ah an inhmachhawn ang.

Inelna neihna hmunah sawm bik tan chauh a kal theih a, LPS Fight Night hmasa ber hi LPS Apps leh PPV channel (LPS pawt tan) hmangin Rs 50 chauh chawiin a en theih.

Kazakhstan boxer Sultan Zaurbek-a'n WBC Youth World Super Featherweight title a lak hnuah kum 24 a tling a, vawi khat mah kawnghren humhim hman loin title a kalsan.

January 15, 2021 khan WBC Youth Championship Program chairman Rex Rose Walker chuan Colorado, USA aṭangin LPS Vision Production Promotion leh a thawhpui Grassroot Boxing Promotion and Management hnenah WBC Youth World Super Featherweight title inchuh phalna a pe.

Mizo zinga professional boxer hmasa ber Lalrinsanga Tlau-in fight vawi li a hmachhawn tawhah hnehna a chang vek a, mi pahnih a knockout. Khawruhlian tlangval Sangtea hian January 30 khan Prince Mojesh Shrivastava chu round thumna lekah a knockout.

Sangtea coach Sete-a chuan, "Shrivastava kan hmachhawn ṭum khan game plan kan nei a, kan ruahmanna angin round thumnaah chiah kan knockout. Tun ṭumah hian round 4 emaw round 5-naah inhnek kan zo ang," tiin round riat khelh tur hman zawh a ngaih loh tur thu a sawi.

Kum 21 mi Sangtea hi kut thlak na tak a ni lo a, chutihrualin a training pui ṭhin Mizo boxer ṭhenkhat chuan Khawruhlian tlangval hi Mizo boxer thiam ber zingah an chhal. A khelh dan hmang hi amateur lam ni loin professional boxing nen an inrem tihin an sawi ṭhin a, zaninah a nihna tak phochhuahin a awm ang.

Sangtea chuan, "Round khatna aṭangin tu nge ka nih tih ka lantir ang," tiin Eric Quarm aia a ṭhat zawk thu a sawi a, WBC Youth World Super Featherweight title-in Mizoram a chhuahsan loh tur thu a sawi bawk.

Kum 23 mi Eric Quarm hian professional boxing vawi nga a khelh tawhah vawi khat a chak lo. December 28, 2019 kha a inhnek hnuhnun ber a ni a, West African Union lightweight title chuhin Lagos, Nigeria-ah champion lai Nigerian boxer Real One Oladosu nen round 10 an inhnek a, unanimous decision-in a tlawm.

Quarm-a coach Daniel Larteykwei chuan, "Tawnhriat neih tamtir ka duh avangin Oladosu kha ka hmachhawn tir a, a inbuatsaih ṭha tawk lo. Tun ṭumah erawh inbuatsaihna kan nei ṭha tawk. Mizoram kan rawn kal chhan WBC Youth World Super Featherweight title kan duh vang a ni a, kan hmaa belt inchhawp hi Ghana-ah kan haw pui ang," tiin a ṭawng huai hle.

Daniel Larteykwei chuan sawi chhunzawmin, "Mizo tlangval hian Quarm-a kut tum a dawn nasat dawn avangin ni li chhung vel chu balhla chauh a ei ang. Mizoram sik leh sa vang emaw ei leh inah emaw chhuanlam kan siam dawn lo. Kan chungah in ṭha a, kan lawm takzet. Mahse ring chhungah chuan kan hnek hrep dawn che u," tiin a inhrosa nasa hle.