Copa del Rey final pahnih khel tur Bilbao

Athletic Bilbao chuan Copa del Rey semifinal second leg-ah Levante chu 2-1 in an hneh a, inkhel hmasa nena belhkhawma 3-2 a chakin final an lut. 

Bilbao hian season hmasa khan Copa del Rey final an lo lut tawh a, mahse, Covid-19 hri len avangin Spanish Cup (2019-20) final hi April 3-ah khelh turin an sawn. 

Season hmasa ang thoa final an luh leh tak avangin Bilbao hian April thla chhungin Copa del Rey final vawi hnih an khel dawn tihna a ni - April 3-ah hian season hmasa champion zawngin Real Sociedad an hmachhawn ang a, April 17-ah Barcelona nen tun season final an khel zui leh ang. 

Copa del Rey semifinal first leg-ah team pahnih hi 1-1 in an lo inhnehtawk tawh a, kar hmasa La Liga-ah khan 1-1 in an inhnehtawk bawk - Ningani zan inkhelah pawh chak tur zawk rinthiam a harsa hle. 

Mahse, Levante-in mual neitu zawk an nih pholangin minute 17-na lekah Roger Marti hmangin goal hmahruai an khung a, beiseina a sang hman hle. 

Levante hlim chhung erawh a rei lo - Raul Garcia chuan minute 30-naah penalty hmangin si phurh a sut nghal a, hun pangangaiah goal dang a luh loh avangin extra time khelh a ni. 

Alex Berenguer chuan Bilbao tan minute 112-naah goal a khung leh a, hun tawp thlenga goal dang a luh loh avangin Bilbao-in tun thla chhunga Copa del Rey final pahnih khel turin hnehna an chang.