Everton-in Champions League khelh tum

Ningani zan Premier League inkhelah Everton chuan 1-0 in tlak hlau West Bromwich Albion an hneh a, season thara Champions League khelh an tumna chu an chhi nung zel. 

Mikhual team Everton tan Richarlison chuan minute 65-naah inkhela goal awmchhun hi a khung a, Baggies lamin a chhanletna tur an neih loh avangin point thum nen Everton an haw. 

West Brom tan Mbaye Diagne chuan hun pek belh minute thumnaah si phurh a sut niin a inngai a, mahse a offside avangin pawm a ni lo - video assistant referee (VAR) chuan a nemnghet. 

Everton-in hnehna an chan hian table-ah palina an ni hman a, mahse Chelsea-in 1-0 a Liverpool an hneh zui avangin panganaah an tla thla.

Merseyside club coach Carlo Ancelotti chuan, "Season ṭantir khan match 26 khelh hnuah tuna kan awmna anga kan awm hi tuman an ring lo ang. Tuna kan beisei ber chu Champions League khelh phak a ni a, kan vai atan hmasawnna a ni thei dawn a ni. 

"Hna hautak em em a ni a, a tawp thlenga kan inhlan a ngai ang. Europe kan beisei miau avangin pressure a awm lo thei lo a, European football khelh ngei kan duh a, chumi atan chuan kan thawkrim em em bawk a ni," a ti. 

AC Milan leh Real Madrid-a enkawl laia Champions League nomawi lo chawi tawh Ancelotti chuan, "Table ka en a, kan dinhmun a ṭhat avangin ka hlim takzet. Mahse, a la tawp lo a, theihtawp kan chhuah zel a ngai a ni," tiin chawl hman an la nih loh thu a sawi zui.