Cavani kan la dawn lo - Boca Juniors president
Boca Juniors chuan tun nipui zawh ruala contract hmang zo tur Edinson Cavani an la dawn lo. Club president Jorge Amor Ameal chuan an sum dinhmun thlirin striker ṭha hi an lak theih loh tur thu a sawi.
Uruguay international Cavani hian tun season tawp rualin Paris Saint-Germain tana a contract a hmang zo dawn a, khawthlang media lamin an tarlan dan chuan Superliga champion hi a zawm hreh lo.
Boca Juniors president Ameal chuan, "Player ṭha chungchuang tak Cavani te angin kan club jersey an ha hreh lo tih hriat hi inchhuanna tham a tling. Mahse, player ṭha leh rintlak la tur hian ngaihtuah ngai tam tak a awm, kan sum dinhmun thlirin kan tlin lo," a ti.
Kum 33 mi Cavani-a'n Paris khawpuiah kum sarih hun a hmang tawh, PSG tan nomawi 18 chawi tawhin club tana goal khung hnem ber (200 goals) a ni mek bawk.
PSG tan record siamtu ni mah se season kal laiah rin hlawh ber a ni lo. Kylian Mbappe leh Neymar te an awm bakah Inter Milan aṭangin Mauro Icardi an hawh mek a, kumin January thla pawh khan Cavani hi chhuak tura ngaih a ni hman.
A kum tam deuh tawh mah se Cavani hi goal hmaah a la hriam tawk a, a club hlui Napoli bakah Spanish club ṭha Atletico Madrid te chuan an ngaihven reng nia sawi a awm.