Spurs tan beisei a la bo lo

November hnua a vawi khat nan Tottenham Hotspur chuan Premier League-ah a zawnin hnehna an chang ve leh ta - Ningani zan khan Spurs hian 1-0 in Fulham an hneh a, hemi hma an match-ah hian Burnley chu 4-0 in an lo sawp tawh bawk. 

Spurs tan tun season an league match hmasa ber hnua a vawi khat nan Dele Alli chuan inkhel bul a ṭan a, English midfielder hian a thiam a la theihnghilh lo tih pholangin an goal neihchhun pawh hi a thawhchhuah a ni. 

Alli hian Son Heung-min tan ball a siamsak a, South Korean striker hian Alli tan a cross lut zui - Alli-a ball khawih thawi chu Fulham defender Tosin Adarabioyo chuan lo tawk fuhin an lamah a ti goal. 

Spurs an vannei takzet - tlak hlau Fulham hian na takin an nawr a, anni erawh an vanneih zan a ni lo thung. Josh Maja chuan second half-ah si phurh a sutin a inngai a, mahse, goal luhna kawngah Fulham midfielder Mario Lemina-a handball a, goal-ah pawm a ni lo. 

Tottenham goalkeeper Hugo Lloris chuan Joachim Andersen-a tauh luh ngei tur nia lang chu ṭha takin a dang bawk a, Harry Kane-a hun ṭha neih chu Fulham keeper Alphonse Areola chuan ṭha takin a dang bawk. 

Hun tawp hnuah Fulham goal pawmsak a ni lo chuan sawisel a tawk nasa a, Lemina hi a taksaa bet thlap chungin handball mah se a kut a fuh miau avangin penalty a ni miau si. 

Fulham boss Scott Parker chuan, "Goal pawm loh kha sawisel ka tum lo, dan a ni miau alawm. Ball-in kut a tawh fuh chuan pawm loh tur a ni a, Lemina khan a kut a dahna tur lam erawh sawi thiam a harsa. 

"He dan an siam lai hian ngaihtuahna pangngai pu tan chuan thil thleng thei hi hriatthiam ve tur a ni. Mahse, dan anga a dik miau avangin thutlukna dik lo, tia sawi theih a ni lo," a ti. 

Spurs-in a zawna hnehna an chan avangin European football khelh an beiseina thi lek lek tawh chu a nung thar leh ta a, an khelh danah erawh inchhuang viau tur an ni lo. 

Tottenham manager Mourinho chuan, "Hugo Lloris hi French goalkeeper ṭha ber a ni a, chumi nemngheh nan chuan save ṭha tak tak a nei a ni," a ti a, Portuguese manager ṭawngkam hian inkhel dinhmun thui tak a hrilhfiah.