Bayern mualah Dortmund

German football ngainatute chuan 'Bundesliga Final' tura an hual, mahse an beisei ang ni ta chiah lo chu zanin dar 11:00 hian khelh a ni dawn. Bayern Munich mualah Borussia Dortmund an lenglut ang.

Bayern hi hmahruaitu leh champion leh tura rinkai an nih laiin, season danga an elpui ni ṭhin Dortmund erawh pangana an ni mek - champion beiseina la thamral lo mah se a tlem tawh. Champions League khelh ngei erawh an tum dawn.

Eintracht Frankfurt lakah an chetsual hnuah Bayern Munich an tho chhuak leh tawh. Lazio leh Cologne an hneh a, German Cup aṭanga an tlak tawh avangin Thawhlehni zana inlan Dortmund aiin hahchawlhna hun an ngah zawk.

A zawna season thum Bundesliga goal khung hnem ber, season kal laia goal 28 nei leh tawh Robert Lewandowski ṭhat zia inhrilh nawn a ngai lo. Serge Gnabry leh Leroy Sane ten vanglai an hmang mek bawk a, an thiampuipa Thomas Muller a inkhelh leh theih tawh bawk avangin an ṭha tawk.

Hansi Flick-a'n player khel tur chungchangah duhthlan tur a nei ṭha tawk a, pahnihna RB Leipzig nen an inkarah point hnih chauh a awm avangin chetsual a thiang bik lo - Dortmund hneh ngei turin team a siam ngei ang.

Season an hman ṭhat loh avangin manager Lucien Favre an ban a, assistant manager Edin Terzic-a'n tun season tawp thleng a enkawl dawn. Boruak danglam neih tum mah se beisei ang an la ni thei lo, team ṭha Bayern an hneh a nih erawh chuan beiseina an nei thar ngei ang.

Dortmund hian beisei phak lo mah se Erling Haaland-a goal khung thiamna leh, forward Jadon Sancho thiamna chu thup theih a ni chuang lo. Player pahnih hi an khelh fuh ni a nih chuan Bayern hneh turin theihna an nei, chutih rualin Allianz Arean luhchhuah tur chuan an 'hriam' zual deuh a ngai dawn.

Bayern tlarhnung tan Dortmund hmatawngte ven ṭhat an ngai dawn. Bavarian hian league match 23 khelh chinah Terzic naute aiin goal an chhuah hnem a, an insiamṭha lo a nih chuan tlarhma nei ṭha team laka chesual thei reng an ni.