Conte kaihhruai Inter an kal zel

Serie A champion nih tum Inter Milan chelh thei an awm rih lo. Antonio Conte naute hian Ningani zan khan an khingpui Parma chu 2-1 in an hneh a, point 59 hmuin table chung berah an awm chhunzawm.

Inter tan Alexis Sanchez chuan goal hnih a khung, a goal pahnih hi Romelu Lukaku siamsak ve ve a ni. An hmelma leh elpui AC Milan lakah point rukin an sang fal ta chiah, nomawi chawi thei dinhmunah an ding.

Striker palian Lukaku-a'n goal a khung lo a, amaherawhchu Belgium international hian goal hnih a thawk chhuak. A sut kuak zarah Sanchez-a'n goal hmahruai a khung a, goal hnihna luh theih nan pawh a thawhhlawk hle.

Manchester United striker hlui Lukaku hian mual chanve aia hlaah ball a chang a, an khingpui goal lamah chak takin a tlanpui. Box chhung thleng a tlan pheipui a, an khingpui player pathum karah United tana khel tawh Sanchez tan bawk a siamsak leh a ni.

Barcelona leh Arsenal forward hlui Sanchez chuan, "Parma kha an khel ṭha, mahse kan khel ṭha zawk. Khelmual chhungah hian tawnhriat ka nei hnem ve tawh a, ka chunga rinna nghattu coach chungah ka lawm takzet," a ti a, inkhelh tam a duh thu a sawi bawk.

Italian champion Juventus-in tawnhriat nei lo Andrea Pirlo an 'risk' a, tun thleng chuan an la tisual lo niin a lang. Chutih rualin an 'ti fuh' tia sawi theih pawh an la ni chuang lo, season kua zet a zawna an lak theih Serie A title erawh hloh thei dinhmunah an ding mek.

Old Lady hi champion tura rinkai ber an ni rih lo, mahse Cristiano Ronaldo an neih miau avangin engkim a la danglam thei. Zanin dar 1:15 hian team ṭha Lazio an mikhual dawn a, champion turin an ṭha tawk em tih chu fiah a ni ang.

AC Milan beiseina sang hman viau mah se tun hnaiah an zuih. Zlatan Ibrahimovic a hliam a, player naupang zawkte chungah rinna nghah a ngai dawn. Milan hian Pathianni zanah Hellas Verona an lenchilh dawn, an chak a nih chuan Thawhṭan zana inlan tur Inter Milan an hnaih chilh leh thei dawn a ni.