Fimkhur a ngai hle - Arteta

Zanin dar 6:00 hian Premier League khel turin Arsenal chu Burnley mualah an lenglut dawn. Gunners manager Mikel Arteta chuan an khingpuite lakah fimkhur taka an khelh a ngaih tur thu a sawi.

Arteta chuan, "Sean Dyche leh a thawhpuite hian hna an thawk ṭha, tun hnai season thum vel kan thlir kir a nih chuan an team mamawh ang chu an pe thei. Chuvangin kuminah talbuai deuh mah se an theihna kha a la bo chuang lo.

"Kan intawn hnuhnung khan player 10 ni chungin kan khel tluan a, a tawp lamah kan tihsaul vangin kan lamah goal a lut a, a tawpah kan chak lo a nih kha. Chetsual theihna an ni tih a chiang, chuvangin fimkhur taka kan khelh a ngai dawn," a ti.

Emirates Stadium a an inkhelh ṭumin minute 56-naah Granit Xhakha hnawhchhuah a ni a, minute 73-naah Pierre-Emerick Aubameyang chuan anmahni lamah ti lutin 1-0 in an chak lo, tun ṭumah hian thawnthu ziah danglam an tum.