Hmana lawmna Anfield a ngui zo ta

Season ṭantira fans leh expert tam takin Premier League champion ni leh tura an beisei chu Liverpool an ni - mahse, beiseina leh a tak ram chu inhlat tak a ni. 

Manchester City nena inel ber tura ngaih Reds hian Ningani zan khan Anfield-ah Chelsea chu 1-0 in an ngam lo a, season thara Champions League khel tur pawhin an dinhmun a him ta lo hle. 

Liverpool hi Premier League table-ah pasarihna an ni pha ta ṭawk a, hmahruaitu City an thlauhna (22 points) chu 18-na Fulham (20 points) nen an inthlauhna aiin a sang zawk - Pathianni zan dar 7:30-ah Fulham hi an mikhual zui dawn. 

Chelsea tan Mason Mount chuan inkhela goal awmchhun hi a khung a, Liverpool-in a chhanletna tur an nei lo - N'Golo Kante handball vanga an penalty beisei chu pek an ni lo bawk. 

Liverpool khelmual luh dawnah, 'This is Anfield' tih a intar a, coach leh player thar an neih apiangin chu thuziak chu chhuang takin an kutin an khawih a, player-ten khelmual an pan apiangin chutiang chuan an ti bawk ṭhin.

Reds tan chuan Anfield hi hmun danglam bik a ni a, eng team mahin he khelmuala lenluh hi an châk ngai lo. Mahse, league match 68 zet a zawna an tlawm tawh lohnaah hian club tenau Burnley (1-0) chu January khan an chak khauh a, Anfield a nghing ṭan. 

Burnley pawh an chak theihna mualah team dangin chak zawh loh an duh lo a, Brighton (1-0), Manchester City (4-1) leh Everton (2-0) ten Anfield-ah Liverpool an ngam zui a, Chelsea an chak ve leh ta - Anfield-ah Reds hi league match nga zet chu a zawnin an tlawm tawh a, Anfield-a a zawna league match-a an tlawm hnem ber record an siam. 

Ningani zan inkhelah pawh Mount chuan minute 42-naah goal a khung a, Liverpool-in hun tawp thlengin an chhang thei lo - Timo Werner-a goal khung chu offside vangin pawm a ni lo zawk mah mah!

Liverpool-in inhliam vanga chhuanlam siam duh ni se anni tluka chhuanlam siam tur ngah an awm lo - mahse, hei hi football-in a ken tel tih chu hriat sa a ni a, tlarhmaah world class forward pathum Sadio Mane, Mohamed Salah leh Roberto Firmino an dam ṭhat reng bawk avangin an hliam hi chhuanlam atana hman reng a thiang tawh lo. 

Reds hian an vanduaina zawn chiah an thlir dawn a nih chuan Chelsea lakah pawh Kante handball vangin penalty hlawh tur an ni a, mahse, pek an ni lo - chutihrual chuan chak loh chhuanlam sawi tur a tam viau chuan team an talbuai tawh a, chhuanlam zawng loa insiamṭhat a hun tawh tihna a ni. 

Liverpool boss Jurgen Klopp chuan, "Game kha in hmu vek a, kan inhnehtawk hle a ni. An chetsual theih nan theihtawpin kan nawr a, annin chutiang bawkin an ti - anni erawhin an chance neih pakhat an chhawr a, keinin kan chhawr ve lo thung," a ti - Salah chu minute 62-naah lakchhuah a ni a, a lungawi lo hle. Klopp-a'n khelmual chhung leh pawnah hnathawh tur a nei e!

Chelsea erawh club thuneituten Frank Lampard an ban fuhzia tui ti takin an sawi chhunzawm zel ang. Thomas Tuchel enkawlna hnuaiah match 10 chhung chu an tlawm lo tawh a, Thawhṭanni zan dar 11:30-ah Champions League khel tura an elpui Everton an mikhual zui ang.