NorthEast United tan fiahna hun a thleng

Khalid Jamil-a enkawlna hnuaiah NorthEast United-in mi mak tih khawpin hma an sawn a, ISL semifinal hial an lut - zanin dar 7:30-ah final luh inchuhin ATK Mohun Bagan nen an inkhel dawn. 

Highlander hian Jamil-a hnuaia match kua an khelhah tlawm an neih loh avangin ISL semifinal hi lut an ni a, ATK Mohun Bagan erawh season hmasa champion an ni a, team ṭha sa an ni. 

Khalid Jamil-a'n, "Semifinal-a kan inkhel tur chiah kan ngaihtuah a, final sawi a la hun lo," tiin Vanglaini a lo hrilh tawh a, zaninah final luh ngei tumin a team a rem ang. 

Bagan hian season tluanin match 20-ah vawi li chiah tlawm an nei a, vawi li an khingpui inhnehtawkpuiin vawi 12 ngawt an chak - tun dinhmun an thlen nan Roy Krishna a ṭangkai hle. 

A League top scorer a nih zawh hnu lawk, season hmasa ṭan dawna Kolkata club pantu hian season hmasa khan match 21-ah goal 15 ngawt a khung a, tun season league match 19-ah goal 14-a khung leh der tawh bawk. 

Fiji Captain bakah hian David Williams leh Manvir Singh-te hi tlarhmaa ven bik ngai tur an ni a, midfield-ah Motherwell captain hlui Carl McHugh-a awm a, tlarhnungah Sandesh Jhingan leh Tiri-te ho an awm bawk avangin a harsa ang. 

League match sarih zet a zawna an chak zawh loh hnuah Highlander-in Khalid an la a, tlawm awmzia an hre leh tawh lo - Aizawl FC boss hlui hi season ṭan dawna Highlander tana bazar ber a ni a, a duh ang tak player a thlan avangin a team a hrechiang. 

Khalid-a hnuaiah Lalengmawia, Ashutosh Mehta leh VP Suhair-te an vul thar a, Khassa Camara-a'n a theihna tak takin a khel chhuak a, an thiampuipa Federico Gallego hman dan a thiam em em a, Luis Machado chu zalenna pein Bengaluru-a beisei phak lo Deshorn Brown-a'n hlim takin goal-a khung leh ta bawk. 

Mizo tlangval Lalengmawia'n, "Khalid-a game plan-ah chuan player zawng zawng kan tel vek a ni," tiin a thlak tak Gerard Nus nena an danglamna Vanglaini hnenah a hrilh a, Khalid-a hnuaiah player an hlim miau avangin an coach leh club tana theihtawp chhuah turin an inpeih ang. 

Tun hmaa Lalengmawia hming la hre ngai lo tan pawh Vaivakawn tlangval hming hi chhinchhiah loh theih a ni tawh lo - zaninah pawh NorthEast United tan bul ṭan tura beisei a ni a, midfielder Lalrempuia Fanai, forward Rochharzela leh striker Lalkhawpuimawia an la awm bawk. 

Mohun Bagan lamin Mizoram player kawl an nei lo thung. Kolkata club hian NorthEast nen league match vawi hnih an intawnah khan vawi khat hnehna changin vawi khat an tlawm a, an inngam tawk hle. 

Hriat ve atana ṭha erawh NorthEast United-in Bagan (2-0) an ngam loh laia an coach chu Gerard Nus a ni a, 2-1 a an hneh ṭuma an coach erawh Khalid Jamil a ni.