Juve chakna Morata goal hnih

Alvaro Morata goal hnih khung hmangin Juventus chuan an mikhual Lazio 3-1 in an hneh a, an thiampuipa Cristiano Ronaldo hahchawlhna hun an pek niah pawh goal khung kawngah buaina an nei lo.

Inrinni zan Allianz Arena a inkhelah Ronaldo chu bench lama dah a ni, 100%-in inkhel turin a inpeih tawk lo nia sawi a ni. Mikhual Lazio lamin Joaquin Correa hmangin minute 14-naah goal hmahruai an khung, mahse Old Lady chhaih kawlhtu mai a ni.

Spain international Morata siamsak hmangin Adrien Rabiot chuan siphurh a sut a, striker Morata hian second half-ah goal hnih khung belhin anmahni mualah nuamsa takin hnehna an chang.

Italian champion hian Thawhlehni zanah Champions League last 16 second leg an khel zui dawn a, Lazio laka hun tawp lama luhtir Ronaldo chu Porto an hmachhawn hunah chuan a tir aṭangin a khel thei tura ngaih a ni.

Andrea Pirlo-a'n hliam vangin Leonardo Bonucci, Paulo Dybala, Giorgio Chiellini leh Matthijs de Ligt te a chhawr thei lo mek a, hrileng kai vangin Rodrigo Bentancur a chawl mek bawk - Porto lakah an ṭhat dan berin an khel thei lo mai thei.